ۇلتتىق سپورت وليمپيادالىق سپورت تۇرلەرىمەن تەڭدەي دارەجەدە داميدى

 استانا. قازاقپارات - ۇلتتىق سپورت وليمپيادالىق سپورت تۇرلەرىمەن تەڭدەي دارەجەدە داميتىن بولادى. بۇل تۋرالى بۇگىن ماجىلىستە «دەنە شىنىقتىرۋ جانە سپورت تۋرالى» زاڭ جوباسىن تالقىلاۋ بارىسىندا ءمالىم بولدى.

ق ر سپورت جانە دەنە شىنىقتىرۋ اگەنتتىگىنىڭ ءتوراعاسى تاستانبەك ەسەنتايەۆتىڭ ايتۋىنشا، جاڭا رەداكتسياداعى زاڭ جوباسىندا ۇلتتىق سپورت تۇرلەرىن دامىتۋعا قاتىستى ماسەلەلەر جەكە باپپەن قاراستىرىلىپ وتىر. «بۇل رەتتە ۇلتتىق سپورتتىڭ وزىندىك ەرەكشەلىكتەرى ەسەپكە الىنا كەلە، ولاردى وليمپيادالىق سپورت تۇرلەرىمەن تەڭ دارەجەدە دامىتۋدى كوزدەپ وتىرمىز» ، - دەيدى تاستانبەك ەسەنتايەۆ.

اگەنتتىك باسشىسىنىڭ سوزىنە قاراعاندا، قۇجات بويىنشا دەنە شىنىقتىرۋ جانە سپورتتى دامىتۋ باعىتىندا ۇكىمەتتىڭ قۇزىرەتى كەڭەيتىلەدى. اتاپ ايتقاندا، دەنە شىنىقتىرۋ جانە سپورت سالاسىنداعى مەملەكەتتىك ساياساتتىڭ نەگىزگى باعىتتارى ازىرلەنەدى. بۇدان بولەك، حالىقارالىق جارىستاردىڭ جەڭىمپازدارى مەن جۇلدەگەرلەرىنە، سپورت تۇرلەرى بويىنشا قۇراما كوماندالار جاتتىقتىرۋشىلارى مەن مۇشەلەرىنە قارجىلاي سىياقى تولەۋ قاعيدالارى مەن تىزبەسى بەكىتىلمەك. سونىمەن قاتار، سپورتشىلار مەن جاتتىقتىرۋشىلارعا ءومىر بويى اي سايىنعى ماتەريالدىق قامتاماسىز ەتۋ تولەمدەرىنىڭ قاعيدالارى ناقتىلانىپ، مولشەرى بەكىتىلەدى.

«سونىمەن قاتار، سپورتتىق فەدەراتسيالاردى اككرەديتتەۋگە قويىلاتىن جاڭا تالاپتار بەلگىلەنەتىن بولادى. بۇل شارا رەسپۋبليكالىق جانە جەرگىلىكتى دەڭگەيدە جۇزەگە اسادى. وسىعان وراي، وليمپيادالىق جانە وليمپيادالىق ەمەس سپورت تۇرلەرىنە، سونىمەن قاتار ۇلتتىق سپورت تۇرلەرى ەرەكشەلىكتەرىنە قاراي فەدەراتسيالارعا قويىلاتىن تالاپتار ايقىندالدى» ، - دەيدى اگەنتتىك ءتوراعاسى ت. ەسەنتايەۆ.

 

اۆتور: قانات مامەتقازى ۇلى