14:37, 28 - مامىر 2014 | GMT +5
شەرۋشىلەر پرەزيدەنت كەڭسەسىن باسىپ الدى
استانا. قازاقپارات - گرۋزيانىڭ جىكشىل ابحازيا ايماعىنىڭ ورتالىعى سۋحۋمي قالاسىندا 27-مامىر كۇنى وپپوزيتسياشىل دەمونسترانتتار ايماق باسشىسىنىڭ كەڭسەسى ورنالاسقان عيماراتتى باسىپ الىپ، ءبىر بولىگىن قيراتتى.
جۇزدەگەن ادام عيمارات الدىنا ۇكىمەتتىڭ بەيقامدىعىنا نارازىلىق ءبىلدىرىپ، رەفورمالار جۇرگىزۋدى تالاپ ەتۋگە جينالعان.
دەمونسترانتتار پرەزيدەنت الەكساندر انكۆاب وتىرعان عيماراتتى باسىپ الۋعا بىرنەشە رەت ارەكەت قىلىپ، سوڭىندا تەرەزەنى سىندىرىپ كىردى.
الەكساندر انكۆاب وپپوزيتسيا جەتەكشىسى راۋل حادجيمبامەن كەزدەسۋگە كەلىسىم بەرىپ، سوسىن ۇكىمەتتى تاراتاتىنىن ايتىپ، عيماراتتى تاستاپ شىقتى.
بۇدان سوڭ دا شەرۋ جالعاسىپ، وپپوزيتسيا انكۆابتىڭ ءوزىنىڭ دە وتستاۆكاعا كەتۋىن تالاپ ەتكەن.
ابحازيا مەن گرۋزيانىڭ تاعى ءبىر جىكشىل ايماعى - وڭتۇستىك وسەتيانى ماسكەۋ 2008-جىلى تامىزدا رەسەي مەن گرۋزيا اراسىنداعى قىسقا مەرزىمدى سوعىستان كەيىن تاۋەلسىز دەپ تانىعان. ءبىراق تبيليسي بۇل ايماقتاردى ءالى گرۋزيانىڭ ءبىر بولىگى سانايدى.
«ازاتتىق»
