استاناداعى جۇمىسسىزدىق رەسمي مالىمەتتەردەن ءۇش ەسەگە جوعارى - قالا اكىمىنىڭ ورىنباسارى

استانا. قازاقپارات - استاناداعى رەسمي ەمەس جۇمىسسىزدىق دەڭگەيى رەسمي كورسەتكىشتەرگە قاراعاندا ءۇش ەسە جوعارى.

بۇل تۋرالى بۇگىن جۇمىسپەن قامتۋ ماسەلەسى بويىنشا استانا فورۋمىندا قالا اكىمىنىڭ ورىنباسارى ايدا بالايەۆا ءمالىم ەتتى.

«بۇگىندە رەسمي ەمەس جۇمىسسىزدىق دەڭگەيى تۋرالى ايتۋ قيىنداۋ. الايدا، ەلورداعا ءتان ومىرلىك قارقىن مەن تولاسسىز كوشى-قون اعىنى رەسمي ەمەس جۇمىسسىزدىق اۋقىمى رەسمي دەرەكتەرمەن سالىستىرعاندا 2-3 ەسە ارتىق بولۋى مۇمكىن ەكەنىن بايقاتادى»، - دەدى ول.

ونىڭ مالىمەتتەرىنە قاراعاندا، قازىرگى كەزدە استاناداعى جۇمىسپەن قامتۋ قىزمەتتەرىندە 24 مىڭ جۇمىسسىز رەسمي تىركەلگەن. ءبىراق تا، وسىعان قاراماستان، رەسپۋبليكا بويىنشا ەلوردالىق جۇمىسسىزدىق كورسەتكىشى ەڭ تومەنگىلەردىڭ ساناتىندا.

«قالالىق بيلىكتىڭ بەلسەندى ءىس-قيمىلىنىڭ ارقاسىندا بۇل كورسەتكىش سوڭعى بەس جىل قاتارىنان تۇراقتى بولىپ كەلەدى. ول ءۇشىن قالا اكىمىنىڭ تاپسىرماسىمەن شاھارداعى پروبلەمالاردى شەشۋگە باعىتتالعان ءىس-قيمىلداردىڭ ناقتى الگوريتمى جۇزەگە اسىرىلدى. ولاردىڭ بارلىعى ءۇش نەگىزگى قۇجاتتىڭ ماقساتتارىنا، ياعني 2015 - جىلعا دەيىن استانانى دامىتۋ باعدارلاماسىنا، «جۇمىسپەن قامتۋ-2020» مەملەكەتتىك باعدارلاماسىنا جانە 2013-2014 - جىلدارى ەڭبەك نارىعىن رەتتەۋ بويىنشا ەلوردالىق اكىمدىكتىڭ جالپى قالالىق ءىس-قيمىلى جوسپارىنا نەگىزدەلگەن»، - دەدى ا. بالايەۆا.

ناتيجەسىندە، جىل سايىن قالادا 15 مىڭ جاڭا جۇمىس ورىندارى قۇرىلۋدا. ولاردىڭ باسىم بولىگى الەۋمەتتىك سەكتورعا تيەسىلى.

 

اۆتور: رۋسلان عابباسوۆ