استانا - ۇلان-باتور باعىتىندا تۇراقتى رەيستەر اشىلادى

استانا. قازاقپارات - قازاقستان مەن موڭعوليانىڭ اراسىنداعى اۋە قاتىناسى قالپىنا كەلتىرىلەتىن بولادى، دەپ حابارلايدى ق ر كولىك جانە كوممۋنيكاتسيا مينيسترلىگىنىڭ باسپاءسوز قىزمەتىنەن.

 اتاپ ايتقاندا، «بەك ەير» اۆياكومپانياسى بايان-ولگي قالاسىنا، ال«ەير استانا» «استانا -ۇلان-باتور» باعىتىندا تۇراقتى رەيستەر اشۋعا نيەت بىلدىرۋدە.

ق ر ك ك م ازاماتتىق اۆياتسيا كوميتەتى ءتوراعاسىنىڭ ورىنباسارى تالعات لاستايەۆتىڭ ايتۋىنشا جاڭا رەيستەردىڭ اشىلۋىنا ەكى ەلدىڭ اۆياتسيالىق بيلىكتەرىنىڭ ءوزارا تۇسىنىستىك تۋرالى مەموراندۋمعا قول قويۋلارى سەپتەستى. بۇل قازاقستان-موڭعوليا اراسىنداعى ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسياسىنىڭ تاياۋداعى 6-وتىرىسى بارىسىندا ۇيىمداستىرىلدى.

«موڭعوليادا ءىرى قازاق دياسپوراسى تۇرىپ جاتقانى بەلگىلى. ولاردىڭ تاراپىنان دا، پارلامەنت دەپۋتاتتارىنىڭ تاراپىنان دا كوميتەتكە اۋە قاتىناسىن قالپىنا كەلتىرۋ جونىندە كوپتەگەن وتىنىمدەر كەلىپ تۇسكەن بولاتىن. ءبىز بۇل ماسەلەنى ءوز ارىپتەستەرىمىزبەن تالاي رەت تالقىلاعان بولاتىنبىز: ءساۋىر ايىنىڭ باسىندا مەموراندۋمنىڭ ءماتىنى دايەكتەندىرىلىپ، ەندى قول قويىلدى. قۋانتارلىعى - بۇل باستاما قازاقستان تاسىمالداۋشىلارى تاراپىنان قولداۋ تاپتى. وسىنىڭ ارقاسىندا موڭعوليانىڭ بىرنەشە قالاسىمەن اۆياقاتىناس قالىپتاساتىن بولادى»، - دەپ اتاپ ءوتتى تالعات لاستايەۆ.