اپاتقا ۇشىراعان «سەۆول» كەمەسىنىڭ يەسىنىڭ قىزى تۇتقىنعا الىندى

استانا. قازاقپارات - اپاتقا ۇشىراعان «سەۆول» كەمەسىنىڭ يەسىنىڭ ۇلكەن قىزى فرانسيا ەلىندە تۇتقىندالدى.

بۇل تۋرالى كورەيا رەسپۋبليكاسىنداعى ادىلەت مينيسترلىگىنەن حابارلادى، دەپ جازادى يتار-تاسس.

 «يۋ بەن وننىڭ قىزى - 48 جاستاعى يۋ سوم نانى فرانسۋز بيلىگى باسقانىڭ مۇلكىن يەمدەندى دەگەن كۇدىكپەن تۇتقىنعا الىپ وتىر. بۇل كورەيا رەسپۋبليكاسىنىڭ پروكۋراتۋراسى ينتەرپولعا ونىڭ قاي جەردە ەكەنىن انىقتاپ بەرۋ جونىندە ءوتىنىش جاساعاننان كەيىن مۇمكىن بولدى»، - دەپ حابارلايدى مينيسترلىك قىزمەتكەرى.

ايتا كەتەيىك، «سەۆول» كەمەسى تيەسىلى بولعان «چحونحەچجين حەۋن» كومپانياسىنىڭ باسشىسى يۋ بەن ون قىزمەتتىك بابىن تەرىس پايدالاندى جانە سالىق تولەۋدەن جالتاردى دەپ ايىپتالىپ وتىر. وعان قازىر ىزدەۋ جاريالانعان. تەرگەۋ مالىمەتتەرى بويىنشا ول سەۋلدەگى ءدىني سەكتالاردىڭ بىرىندە جاسىرىنىپ جۇرگەن بولۋى مۇمكىن.

وڭتۇستىك كورەيا پروكۋراتۋراسى يۋ بەن ونمەن بىرگە ونىڭ شەتەلدە جۇرگەن ەكىنشى ۇلى يۋ حيۋك گيدى تۇتقىنعا الۋ وردەرىنە قول جەتكىزۋگە تىرىسۋدا. جاقىن ارادا فرانسيا ۇكىمەتى ولاردى ەلىنە قايتارادى دەپ كۇتىلىپ وتىر.

ەستەرىڭىزگە سالا كەتەيىك، ءساۋىر ايىنىڭ ورتاسىندا بورتىندا 476 جولاۋشىسى بار «سەۆول» پارومى وڭتۇستىك كورەيا جاعالاۋىندا اۋدارىلىپ، باتىپ كەتتى. ونىڭ ىشىنەن تەك 174 جولاۋشى عانا امان قالدى.