ەلىمىزدە قازاق ءتىلىن ۇيرەنۋدىڭ زاماناۋي جولى كوپشىلىك نازارىنا ۇسىنىلدى
«بۇل جوبا بۇگىن بۇكىل قازاقستان بويىنشا ىسكە قوسىلدى. وعان ادامدار ەلىمىزدىڭ تۇكپىر- تۇكپىرىنەن تىركەلە الادى. وسىلايشا قازاق ءتىلىن ۇيرەنگىسى كەلگەندەر اۋىل- ايماقتان تىركەلگەن اعا- اپالارىمىزبەن، اتا- اجەلەرىمىزبەن سويلەسە وتىرىپ مەملەكەتتىك ءتىلدى مۇمكىندىگىنشە تەز ۇيرەنە الادى. باستى تالاپ - بەينەبايلانىس. ەشقانداي «چات» ، «فورۋم» دەگەن بولمايدى.
قازاق ءتىلىن جاقسى بىلەتىندەر سايت بەتىندە «مەنتور» ايدارىنا تىركەلەتىن بولسا، ءتىل ۇيرەنگىسى كەلەتىندەر «وقۋشى» ايدارىنا تىركەلەدى. تىركەلۋگە قانداي دا ءبىر تالاپتار قويىلمايدى. بۇل جەردە ادامداردىڭ ار- ۇياتىنا ءۇمىت ارتامىز. ەسىمىن جاسىرعىسى كەلگەندەر لاقاپ اتتارىن جازا بەرۋلەرىنە بولادى. ءبىراق ەلەكتروندى پوشتاسى دۇرىس جازىلعانى ءجون. ويتكەنى سايت الداعى ەكى اپتا بارىسىندا تولىققاندى ىسكە قوسىلعان سوڭ، تىركەلگەن پوشتالارعا حابارلاندىرۋلار جىبەرەمىز. ال، تىركەلگەن «مەنتورلاردىڭ» ءبىلىم دەڭگەيىن «وقۋشىلار» ۋاقىت وتە كەلە وزدەرى- اق انىقتاپ الادى» - دەدى قازاقپارات تىلشىسىنە بەرگەن سۇحباتىندا وسى الەۋمەتتىك ينتەرنەت سەرۆيستىڭ نەگىزىن قالاۋشىلاردىڭ ءبىرى ولجاس بەيسەمبايەۆ.
تىركەلۋشىلەر سايت بەتىنە وزدەرىنىڭ اتى- جوندەرىن، سۋرەتىن جانە وزدەرى جايلى قىسقاشا ماعلۇمات قالدىرادى. و. بەيسەمبايەۆ تىركەلۋشىلەردىڭ كوپ بولاتىندىعىنا سەنىم ارتۋدا. «ويتكەنى ەلىمىزدە ينتەرنەت پايدالانۋشىلار سانى كۇن ساناپ ارتىپ كەلەدى» ، - دەيدى ول.
سونىمەن قاتار، سايتتىڭ نەگىزىن قالاۋشىلار ەگەر «وقۋشىلار» سانى كۇرت ارتىپ كەتەتىن بولسا، ال ولارمەن تىلدەسەتىن «مەنتورلار» سانى تىم از بولسا، وندا قازاق ءتىلىنىڭ ماماندارىن سايت بەتىنە تارتۋ ءۇشىن ولارعا سىياقىلار تاعايىندالاتىندىعىن جەتكىزدى. ال وقۋشىلار ءۇشىن ءقازىر ءبىر رەتتىك تىركەلۋ جارناسى - 200 تەڭگە.
اۆتور: جاپپاربەرگەن ايبوتا
