بەسىنشى باسشىنىڭ بەت-بەينەسى

استانا. قازاقپارات - ۋكراينادا كەزەكتى پرەزيدەنت سايلاۋى اياقتالدى.

داۋىس بەرۋ ءبىر كۇن بولعانىمەن ساياسي ناۋقاننىڭ باستالعانىنا دا ءبىراز ۋاقىت بولعان.

ءتورت ءتۇرلى پرەزيدەنتكە «باعىنعان» ۋكراين حالقى كەشە بەسىنشى باسشىسى ءۇشىن داۋىس بەردى. ورتالىق سايلاۋ كوميسسياسى تۇپكىلىكتى قورىتىندىسىن شىعارماسا دا ۇلتتىق exit poll مالىمەتتەرىنە قاراعاندا پەتر پوروشەنكو العاشقى تۋردىڭ وزىندە جەڭىسكە جەتكەن.

ايگىلى ميللياردەرگە ەلەكتوراتتىڭ 55,9 پايىزى سەنىم ارتقان. كەيبىر ساراپشىلار ءباس تىككەن، الايدا سايلاۋدا ەكىنشى ورىنعا يە بولعان يۋليا تيموشەنكونىڭ ءوزى 12,19 پايىز داۋىسقا يە بولدى. قالعان كانديداتتار 10 پايىزدى دا ەڭسەرە المادى.

پەتر پوروشەنكو كىم؟ ونىڭ الداعى ستراتەگيالىق ءجۇرىسى قانداي بولماق؟

ول ۋكراينانىڭ سوڭعى لەگيتيمدى ۇكىمەتىنىڭ قۇرامىندا مينيستر، بۇرىندارى ۇلتتىق بانككە ءتوراعالىق ەتكەن، V شاقىرىلىمدا دەپۋتات بولعان. ەلگە ەڭبەگى سىڭگەن ەكونوميست، مەملەكەتتىك سىيلىقتىڭ لاۋرەاتى.

پوروشەنكو دا پوستكەڭەستىك ەلدەردەن شىققان شونجارلار سياقتى الماعايىپ كەزەڭدە بيزنەسپەن اينالىسقان. قاناتى قاتايىپ، «ءمۇيىزى» شىعا باستاعاندا ساياساتقا ۇمتىلدى.

«جامان ساياساتكەردى جاقسى بيزنەسمەن جەمقورلىققا باتىرادى» دەگەن ءتامسىل پ. پوروشەنكوعا قانشالىقتى قاتىسى بارىن انىق بىلمەيمىز، ءبىراق بۇل ساياساتكەردىڭ ءجۇرىپ وتكەن جولىنا قاراساڭىز ءبىرتالاي باسشىمەن تىزە قوسىپ جۇمىس ىستەگەن. پرينتسيپشىل ەمەس. مىسالى ۆيكتور يانۋكوۆيچتىڭ العاشقى ماسقاراسىنىڭ ناتيجەسىندە بيلىككە كەلگەن باتىسشىل ۆيكتور يۋشەنكومەن جاقىن دوس بولعان. ءتىپتى ەلدىڭ ءۇشىنشى پرەزيدەنتى - پوروشەنكونىڭ ەگىز قىزىنىڭ كىندىك اكەسى. يۋشەنكونىڭ «ناشا ۋكراينا» ساياسي بلوگىنا ساياسي، قارجىلىق كومەك بەرگەن دە وسى پەتر پوروشەنكو بولاتىن. سونداي-اق ول، رەسەيشىل ۆيكتور يانۋكوۆيچتىڭ ەكىنشى رەت ماسقاراسى شىققانشا، ازاروۆ ۇكىمەتىنىڭ قۇرامىندا 9 اي، ياعني 2012-جىلدىڭ 24-جەلتوقسانىنا دەيىن ەكونوميكالىق دامۋ جانە ساۋدا مينيسترلىگىن باسقاردى.

ساياسي امبيتسياسى

ول ءوزىن كاسىبي بىلىكتىلەر ساناتىنا جاتقىزادى. جوعارى باعالايدى دەسەك تە بولادى. 2000-جىلى، 35 جاسىندا پەتر پوروشەنكو امبيتسياسىن جاسىرماي، الداعى ءتورت-بەس جىلدا ساياسي مارتەبەسىن جوعارىلاتاتىنىن جەتكىزگەن. 2005-جىلى ۇزەڭگىلەسى ۆ. يۋشەنكو پرەزيدەنت بولعاندا ۇكىمەتتەى باسقارۋدان دامەلى بولدى. الايدا، العاشقى باتىسشىل باسشى ساياسي ساۋدا ناتيجەسىندەگى ماجبۇرلىكتەن پرەمەر-مينيستر ورىنتاعىن يۋليا تيموشەنكوعا ۇسىندى. پوروشەنكو سول كەزدە ەڭ باستىسى قىزمەت ەمەس، ۆيكتور يۋشەنكونىڭ كومانداسىندا قىزمەت ەتۋ دەگەندى مەڭزەپ «جوق، مەن بۇنى پرەزيدەنتتىڭ قۇزىرىنداعى دۇنيە دەپ بىلەمىن، ول قايدا جىبەرسە دە جۇمىس ىستەۋگە ءازىرمىن» دەگەن ەكەن.

ساياساتكەر رەيتينگى

2008-جىلى جاسالعان ۋكراينالىق 100 ىقپالدى تۇلعانىڭ ىشىندە 23-ساتىدا تۇرعان پوروشەنكو ەندى ەكونوميكالىق رەيتينگتە عانا ەمەس، ساياسي ىقپال جاعىنان دا العاشقى ساتىعا شىعاتىن بولادى.

ساياساتكەر ءاميانى

بۇدان 5 جىل بۇرىن 1ميلليارد دوللاردان استام قارجىسى بار دەلىنەتىن پورشەنكونىڭ قازىر كەدەيلەنىپ قالماعانى بەلگىلى. ەڭ العاشقى كولىگىن ول 5-كۋرس ستۋدەنتى بولعان كەزىندە مىنگەن. قازىرگىسى Bentley ەكەن. Dragon Capital مالىمەتتەرىنە قاراعاندا ونىڭ يەلىگىندە كونديتەرلىك فابريكالار، مەديارەسۋرستار جانە اۆتوزاۋىت بار. ايتپاقشى ول 2010-جىلى سەۆاستوپولدەگى تەڭىز زاۋىتىن ءوز يەلىگىنە العان ەدى. قازىرگى جاعداي بەلگىلى. قىرىم رەسەي قۇرامىنا وتكەننەن كەيىن سوڭعى مالىمەت سەنىمدىرەك سياقتى. دەرەك بويىنشا پوروشەنكونىڭ جەكە بايلىعى - $ 980 ميلليون دەسەدى.

پوروشەنكو نەنى قولدايدى؟

ول ۋكراينالىقتاردىڭ ءبىرتۇتاس يدەياعا شوعىرلانۋدى قالايدى. جالاقىدان ۇستالاتىن سالىق مولشەرىن ايتارلىقتاي تومەندەتۋدى، شاعىن جانە ورتا بيزنەسكە سالىناتىن سالىققا جەڭىلدىكتەردى، كولەڭكەلى ەكونوميكاعا قارسى كۇرەس زاڭىن قابىلداۋدى، قورعانىس كۇشتەرىنە قوعامدىق باقىلاۋ ورناتۋدى، قوعامدىق تەلەارنا اشۋدى قولدايدى.

نەگە قارسى؟

ۋكراينانىڭ شىعىس جانە باتىس بولىپ جاساندى بولىنۋىنە، بىرلەسكەن كاسىپورىندارعا جەڭىلدىك بەرۋگە، بۇقارالىق اقپارات قۇرالدارىن ساياسي رۋپور رەتىندە پايدالانۋعا قارسى.

قىزىعۋشىلىعى

ءوزىنىڭ ايتۋىنشا، بوس ۋاقىتى جوق. قاربالاستاردان قول بوساي قالسا تەننيس وينايدى. سپورتتىڭ وزگە تۇرلەرىنە دە قىزىعۋشىلىعى بار. اتاپ ايتار بولساق، جاس كەزىندە دزيۋدو، سامبومەن اينالىسقان. سپورت شەبەرىنە كانديدات اتاعى تاعى بار.

ۋكراينا ءۇشىن پرەزيدەنتتىك سايلاۋدىڭ بىرنەشە تۋرعا سوزىلۋى ءتيىمسىز ەدى. ايقىن باسىمدىقپەن ءبىر ۇمىتكەردىڭ قارا ءۇزىپ شىققانى جاقسى دا بولعان سياقتى. بىرىنشىدەن، ەكونوميكالىق جاعىنان تۇرالاپ قالعان مەملەكەت ءۇشىن جالپىۇلتتىق سايلاۋ ۇيىمداستىرۋدىڭ شىعىنى وڭاي ەمەس.

ەكىنشىدەن، ەل ءىشىن الاتايداي ءبۇلدىرىپ جاتقان سەپاراتيستەر باردا سايلاۋدى سوزىپ، سوڭىن ىرىڭ-جىرىڭ ەتۋ مەملەكەت ءۇشىن قاۋىپتى.

قىسقاسى جاڭا پرەزيدەنتتىڭ الدىندا ۇلكەن مىندەت تۇر. ونى ايتىپ اقىلگويسىنبەي- اق قويايىق...

اسىل قاراش
«سايگەز» سايتى