بەۆەرلي-حيللزدە تالتاڭداعان حراپۋنوۆ الماتى قالاسىنىڭ اكىمدىگىنە بوي بەرە مە؟

استانا. قازاقپارات - الماتىنىڭ بۇرىنعى اكىمى ۆيكتور حراپۋنوۆ باتىس باسپاءسوزىن جىلجىمايتىن مۇلىگىمەن تاڭعالدىرۋدا.

اۋەلدە ەۋروپالىق باسىلىمداردان توقىمداي عانا شۆەيتساريادان قوماقتى جەر ساتىپ الدى دەگەندى ەستىدىك. تاعى دا سول دەرەككوزدەردەن اتىشۋلى وتباسىنىڭ وففشورلىق شوتتارى مەن بانكتەگى قاراجاتى بەلگىلى بولدى.

بۇگىنگە دەيىن قازاقستاندا ۆيكتور حراپۋنوۆ پەن ءلايلا حراپۋنوۆاعا قاتىستى 24 قىلمىستىق ءىس قوزعالعان ەكەن.

قىزمەت بابىن اسىرا پايدالانۋ، الاياقتىق جولمەن بيۋدجەت قارجىسىن جىمقىردى جانە زاڭسىز جەكەشەلەندىرۋ جۇرگىزۋ، زاڭسىز كىرىستى زاڭداستىرعانى، پارا العانى ءۇشىن جانە ۇيىمداسقان قىلمىستىق توپ قۇرعانى سياقتى ايىپتار تاعىلعان.

سوت تالابىن ەلەۋسىز قالدىرىپ، ءتىپتى ەلگە كەلۋدى قيىنسىنعان حراپۋنوۆ مىرزانى الماتى قالاسى اكىمدىگى بۇل جولى لوس-انجەلەس ايماقتىق سوتىنا تارتىپ وتىر.

حراپۋنوۆ پەن ونىڭ وتباسىنا قاتىستى الماتى قالاسى اكىمدىگى باتىس امەريكا ايماعى سوتىنا شاعىم ءتۇسىرىپ، الماتىعا تيەسىلى جىلجىمايتىن مۇلىكتى ساتۋ ارقىلى 300 ميلليون دوللاردى جىمقىردى دەگەن ايىپ تاعۋدا. نەلىكتەن قازاقتار ءجيى جۇگىنەتىن لوندون جوعارى سوتىنا ەمەس، ودان ارىدەگى لوس-انجەلەس سوتىنا جۇگىندى دەگەن سۇراق تۋىندايدى.

سەبەبى، كاليفورنيا جانە نيۋ-يورك شتاتتارىنان، ەۋروپا مەن تاياۋ شىعىس ەلدەرىنەن حراپۋنوۆتار وتباسى كاسىپورىندار، ۆيللالار، اۆتوكولىكتەر مەن باسقا اكتيۆتەر ساتىپ العان. مىسالى، لوس-انجەلەستەگى ايگىلى بيەۆەرلي-حيللز اۋدانىنان قۇنى 6,2 ميلليون دوللار تۇراتىن ۆيللا مەن ستۋديو-سيتيدەن 5,7 ميلليون دوللارلىق عيمارات ساتىپ العان.

شاعىمدانۋشى تاراپ ايىپتالۋشىنىڭ ەسەپشوتتارىن جاۋىپ، زاڭسىز قاراجاتتى الماتىنىڭ قازىناسىنا قايتارۋ كەرەك ەكەندىگىن مالىمدەدى. ءاسىلى، بارلىق سوتتىڭ تالاپ ەتەتىنى وسى. الايدا اتىشۋلى وتباسى سوتتىڭ شەشىمىنە قۇلاق اسىپ، ادىلدىككە مويىنسۇنسا وسى كۇنگە دەيىن الماتىعا ءتيىستى قوماقتى قاراجاتتى قايتارىپ العان بولار ەدىك. Bloomberg دەرەككوزىنىڭ مالىمەتىنشە، الماتى قالاسى اكىمدىگىنىڭ زاڭگەرى دەۆيد شيندلەر حراپۋنوۆقا عانا ەمەس، ا ق ش-قا دا ايبات شەگىپ وتىرعانداي.

«كەزىندە حراپۋنوۆ ءوزىنىڭ قىزمەت بابىن اسىرا پايدالانىپ، قازاقستان حالقىنىڭ ميلليونداعان قارجىسىن قولدى ەتىپ، زاڭسىز جيعان قارجىنى شەتەل اسىرىپ جىبەرىپ وتىرعان. سول سەبەپتى ءبىز ا ق ش-تى زاڭسىز اقشانى جاسىراتىن ەل رەتىندە تانىلۋدى قالايدى دەپ ويلايمىز»، -  دەدى ول.

زاڭگەردىڭ ايتىپ وتىرعانى اشى دا بولسا شىندىق. كەز كەلگەن ەلدەن جىمقىرىلعان قاراجات ا ق ش-تا زاڭدى مۇلىك ساتىپ الۋعا جاراپ-اق تۇر. ولاي بولسا، الماتى قالاسىنا تيەسىلى ميلليونداعان قارجىنى كەرى قايتارۋدىڭ ءساتى تۋعان سياقتى.

جالپى، شاعىمدانۋشىنىڭ تالابى بويىنشا، لوس-انجەلەستەگى سوت الدىندا ۆيكتور حراپۋنوۆ جانە ونىڭ ايەلى ءلايلا، ەكس-اكىمنىڭ اسىراپ العان قىزى ەلۆيرانىڭ كۇيەۋى دميتري كۋدرياشوۆ پەن اسىراندى ۇلى يلياستىڭ جۇبايى -ءمادينا ءابليازوۆا دا جاۋاپ بەرەتىن بولادى. 2008-جىلعى ساۋىردە بۇل وتباسى شۆەيتسارياعا قونىس اۋدارعان بولاتىن. ال 2012-جىلى قازاندا ۆيكتور حراپۋنوۆتىڭ ايەلى ءلايلاعا ءىرى كولەمدى الاياقتىق جاساعانى ءۇشىن حالىقارالىق ىزدەۋ جاريالانعان.

قازاقستاننان قاشقاندار ءبىر بۇلار ەمەس. بارلىعى دا قۇرالاقان كەتكەن جوق. قازىنا قارجىسىن، ەڭ باستىسى قارا حالىققا تيەسىلى ىرىستى الا كەتتى. ولاردى قۇشاق جايا قارسى العان باتىس ەلدەرى، تۇك بولماعانداي بەيقام.

اقنيەت وسپانباي
تۇركىستان