بەكبولات تىلەۋحان: ۇلتتىق سپورتتاتىمىزدى مەكتەپ باعدارلاماسىنا ەنگىزۋ كەرەك

 استانا.قازاقپارات - كىشكەنتايلارىمىز بەل جازىپ وينايىن دەسە، ويىن الاڭدارى قازىر جوقتىڭ قاسى. تار جەردە دە، بەل جازۋعا مۇمكىندىك بەرەتىن ءبىر ويىن بار. اسىق اتۋ دەپ اتالادى.

ءبىر كەزدەرى، «اسىق ويناعان ازار» دەپ، تيىم سالىنىپ ەدى. قازىر قاجەت بولىپ تۇر. دەنساۋلىققا وراسان پايداسى بار ەكەن.

 تاڭ ازاننان قارا كەشكە دەيىن - كومپيۋتەر. قازىرگى جاستاردىڭ ەرمەگى -  وسى. دالاعا شىعىپ، بالا بولىپ ويناۋدى دا قويعان. سىرتقا شىعا قالعاننىڭ وزىندە، كوزى جىلت ەتكەن، جىلپ ەتكەن تەلەفونىندا.

بەرىك سۇلتان، جۋرناليست: 

ۇلتتىق سپورتقا كوڭىل ءبولىپ، ناسيحاتتاۋىمىز كەرەك. ارينە، بارلىعى ارعىماققا سەكىرىپ ءمىنىپ، سەركە تارتىپ كەتە المايدى. اۋدارىسپاققا دا شامامىز جەتپەۋى مۇمكىن. قالالىق جاعدايعا وتە قولايلى ويىن ءتۇرى بار. ول - اسىق. 

 بۇل جىگىت ءار سەنبى سايىن، «بايتەرەكتىڭ» تۇبىندە «اسىق Party» ۇيىمداستىرىپ ءجۇر. ونداعى ماقساتى -  قازاقتىڭ ءوزى ءۇشىن ەكزوتيكاعا اينالىپ كەتكەن اسىقتى كۇندەلىكتى ويىننىڭ ءبىرى ەتۋ.

 ونىڭ ءبىر امالى -  تانىمال كىسىلەردى ويىنعا شاقىرۋ. سولار باستاپ بەرسە، قالعانى ءوزى- اق ءىلىپ الىپ كەتەدى. بۇل ءتاسىلدى استانادا اسىق اتۋدان رەسپۋبليكالىق اشىق كونكۋرستى ۇيىمداستىرعاندار ءساتتى پايدالاندى.

 نە كەرەك، ەسىمى ەلگە بەلگىلى كىسىلەر كەلدى جارىسقا. ساقاسىن سايلاپ، شارشى الاڭعا ءبىرىنشى ەرماحان ىبىرايىموۆ پەن قايرات نۇرتاس شىقتى. ءيا، ەكەۋىنىڭ سالماعى دا، جاسى دا سايكەسپەيدى. ءبىراق، اسىقتىڭ قىزىعى سول، ادامداردى كاتەگورياعا بولمەيدى.

قايرات نۇرتاس، ءانشى: 

 مەن اسىقتى جاقسى ويناعانمىن، اسىعىم دا كوپ بولعان. بۇگىن ويناعان كەزدە ازداپ قوبالجىدىم. ءسال دايىندالعاندا مۇمكىن ۇتار ما ەدىم؟ !

بەكبولات تىلەۋحان، ۇلتتىق سپورت تۇرلەرى قاۋىمداستىعىنىڭ پرەزيدەنتى: 

 تۇڭعىش رەت رەسپۋبليكالىق اشىق تۋرنير ءوتىپ جاتىر. قاتىسۋشىلار 14 وبلىستان كەلدى. بۇل - العاشقى قادامىمىز. ەندى ءارى قاراي جالعاسا بەرەتىن بولسا، قازاق بالاسى اتقا قونىپ، اسىق اتىپ، جامبى اتىپ، ۇلتتىق رۋحاني قۇندىلىقتارعا قاراي بۇرىلادى دەپ ويلايمىز.

 بەكبولات اعامىز، سۇحباتىندا ۇلتتىق سپورتتى - مەكتەپ باعدارلاماسىنا ەنگىزسەك، كەلەشەكتە اسىق ءيىرۋدى، كوكپار تارتۋدىڭ ەرەجەسىن ءاربىر بالا بىلسە، - دەپ، ويلارىن ايتتى. ال، ءبىز اڭگىمەمىزدىڭ باسىندا، اسىق دەنساۋلىققا اسا پايدالى دەدىك ەمەس پە؟ !

رامازان ساتتىبايەۆ، ۇلتتىق سپورت تۇرلەرىنەن مەملەكەتتىك جاتتىقتىرۋشى: 

 اسىق اتۋ - تەك قانا قويدىڭ اسىق جىلىگى مەن كارى جىلىگىنىڭ اراسىنداعى سۇيەكتى الىپ، سونى الاقانعا سالىپ، ەرمەككە اينالدىرۋ ەمەس. مۇنداعى ماڭىزدىسى - بالانىڭ شىنىعۋىنا، دەنساۋلىعىنا اسەرى.

 بالا اسىقتى كوزدەگەندە ءسال ەڭكەيەتىنى بار. وسى كوزدەۋ پروتسەسى -  تۇنىپ تۇرعان يوگا. اياق- قول سەرپىلەدى، جۇرەككە دەم ماسساجى جاسالادى. بۋىندارى قاتايىپ، بوسايدى. ايتا بەرسە، كوپ- اق. دەنساۋلىقتان بولەك، اسىق ويىنى -  بالانى ساناۋعا ۇيرەتەدى.

 اينالاسىنداعى ادامدارمەن ءتىل تابىسۋعا باۋليدى. ودان قالدى، ساقاسىنا قورعاسىن قۇيىپ ءجۇرىپ، مەتالل وڭدەۋدى مەڭگەرىپ الادى. ايتايىن دەگەنىم، بۇل ويىننىڭ پايداسى ۇشان- تەڭىز. تيىسىنشە، «اسىق ويناعان ازار» ، دەگەن بوس ءسوز.

نۇربەك بەكباۋ

«قازاقستان»