وڭتۇستىك قازاقستاننىڭ اتى ليمونمەن شىعۋى مۇمكىن

 استانا. قازاقپارات - بۇدان بىلاي وڭتۇستىكتىڭ اتى ليمونمەن شىعۋى مۇمكىن. تسيترۋستىق ءونىمدى باپتاۋعا اسقان شىدامدىلىق قاجەت. دەگەنمەن، بۇل شارۋادان تۇسەتىن تابىس تا مول.

 بيزنەستىڭ وسى تۇرىنە ازاماتتاردى تارتۋ ءۇشىن شىمكەنتتەگى كاسىپكەرلىك مەكتەبى بولاشاق بيزنەسمەندەردى «اسارداعى» ليمون وسىرەتىن ءتالىمباققا اپارىپ، شەبەرلىك ساباعىن وتكىزدى، دەپ حابارلايدى Отырар ТВ.

كاسىپكەرلىك مەكتەبىنىڭ 30 دان استام تۇلەگىنە ۇلگى بولعان ازامات سەرعازى بەكمۇرات 10 جىلدان بەرى ليمون وسىرۋمەن وبلىستا جالعىز ءوزى اينالىسىپ ءجۇر. اسقان توزىمدىلىكتى قاجەت ەتەتىن ءىستىڭ تابىستى ەكەنىن جاسىرمايدى. سوندىقتان كاسىپتەن ءناسىپ تابامىن دەۋشىلەرگە كاسىپكەرلىك مەكتەبىندە ساباق ءوتىپ، تاجىريبەدە كورسەتىپ، وزىمەن ارىپتەس بولۋعا شاقىرىپ ءجۇر.

ء«بىزدىڭ وتانىمىزعا 15 مىڭ توننادان 20 مىڭ تونناعا دەيىن تسيترۋس ونىمدەرى جەتپەيدى ەكەن. ستاتيستيكامەن الىپ قاراساڭىز، سونىڭ 99 پايىزى شەتتەن كەلەدى. قىتاي، تۇركيا، ماروككو، ءتىپتى، مۇحيتتىڭ ارعى جاعىنداعى مەملەكەتتەردەن. ولاردىڭ باعاسى وتە قىمبات. ال ساپاسى سىن كوتەرمەيدى» ، - دەيدى كاسىپكەر سەرعازى بەكمۇرات.

شەبەرلىك ساباعىنان بولاشاق بيزنەسمەندەر ليموندى باپتاۋدىڭ ءتۇرلى جولدارى مەن پايداسىن ءبىلدى. ەندىگى ءىس بيزنەسمەن بولامىن دەگەن ءاربىر تۇلعانىڭ قالاۋىنا بايلانىستى.