اۆتوبۋستاردا تەگىن ينتەرنەت ورناتىلدى

استانا. قازاقپارات - تۇركىستان قالاسىنىڭ قوعامدىق كولىكتەردىڭ قىزمەتىن تۇتىناتىن تۇرعىندارى بۇدان بىلاي تەگىن ينتەرنەتتى قولدانا الادى.

بۇل تۋرالى وڭتۇستىك قازاقستان وبلىسى اكىمدىگىنىڭ رەسمي سايتىندا حابارلانعان.

 «Beeline»   كومپانياسى 3G Wi-Fi روۋتەرلەردى - بۇكىل الەمدىك جەلىگە قوسىلۋ قۇرىلعىلارىن قالالىق اۆتوبۋستارعا ورناتا باستادى. ياعني اۆتوبۋس مىنگەن تۇركىستاندىقتار ۇشقىر ينتەرنەتكە كىرىپ، قاجەتتى مالىمەتكە قول جەتكىزە الادى.

 بۇگىنگى كۇنى قالادا جۇرگەن بىرنەشە قوعامدىق كولىك ارنايى قۇرىلعىمەن جابدىقتالىپ ۇلگەرگەن. مامانداردىڭ ايتۋىنشا، الداعى ۋاقىتتا ولاردىڭ سانى ارتپاق. ال ينتەرنەتكە شىعۋ ءۇشىن Wi-Fi قوسىلاتىن سمارتفون، پلانشەت نەمەسە نوۋتبۋك قاجەت.

 قالا تۇرعىندارى مۇنداي ەرەكشە اۆتوبۋستاردى سىرتىنداعى اسەم جارنامالارى ارقىلى بىلسە، ىشىنە كىرگەن سوڭ توبەگە ىلىنگەن ارنايى كودتى تەرىپ، قىزمەتتى تۇتىنا الادى.

«  قانداي بايلانىس وپەراتورىنا قوسىلعانىنا قاراماستان بارلىق جۇرگىنشىلەر ينتەرنەتكە تەگىن قوسىلا الادى.   «Beeline  قازاقستان  »   كولىكتەگى ۋاقىتتى ءتيىمدى وتكىزۋگە، جاڭالىقتاردى قاراپ، پوشتانى تەكسەرۋگە، اۋا رايىن ءبىلىپ، الەۋمەتتىك جەلىلەردە سويلەسۋگە جانە سۇيىكتى كىتابىڭىزدى وقۋعا شاقىرادى. تۇركىستان قالاسىنىڭ تۇرعىندارى ءبىزدىڭ باستامامىزدى باعالايدى جانە   «Beeline  ينتەرنەتى  »  قالا تۇرعىندارى اراسىندا جوعارى سۇرانىسقا يە بولادى دەپ ۇمىتتەنەمىز  » ، -   دەيدى   «Beeline  قازاقستان  »   كومپانياسىنىڭ شىمكەنت بولىمشەسىنىڭ ديرەكتورى اسقاربەك قازبەكوۆ.

 باسپاءسوز ءماسليحاتى بارىسىندا قالا اكىمىنىڭ ورىنباسارى داۋرەن تاڭىربەرگەنوۆتىڭ ينتەرنەت جەلىسى بۇدان بىلاي تەك اۆتوبۋستاردا ەمەس، حالىق كوپ جينالاتىن ايالدامالارعا، ساياباقتارعا دا ورناتىلسا دەگەن ۇسىنىسى كوپشىلىك تاراپىنان قولداۋ تاپتى.

 ايتا كەتەيىك،   «Wi-Fi Bus»   رەسپۋبليكالىق جوباسى باستاپقىدا  « سىناقتىق رەجيم  »   رەتىندە پەتروپاۆل قالاسىندا جۇزەگە اسقان. كەيىننەن جوباعا كوكشەتاۋ جانە تۇركىستان قالالارى ەندى.

الداعى ۋاقىتتا باستاما شىمكەنت، قاراعاندى، ورال، قوستاناي، اتىراۋ سىندى ەلىمىزدىڭ باسقا دا قالالارىندا ىسكە اسپاق.