قانات يسىلامنىڭ جەڭىسىن قازاقستاندىق ب ا ق نەگە جازبادى؟
بوكستىڭ بۇل تۇرىنەن ەڭ بيىك جەتىستىككە جەتكەن وتانداسىمىز شىمكەنتتىك - بەيبىت شۇمەنوۆ قانا. ال سونىڭ ءىزىن قۋىپ كەلە جاتقان، بولاشاعىنان زور ءۇمىت كۇتتىرىپ جۇرگەن تاعى ءبىر تالانتتى بوكسشىمىز - قانات يسلام.
جاقىندا، وتاندىق ب ا ق وكىلدەرى قانات يسلام كەزەكتى ايقاسىن، ياعني، 17- جەكپە- جەگىن ءساۋىردىڭ 26 - كۇنى دومينيكا ەلىنىڭ استاناسىندا وتكىزەدى دەپ جازعان بولاتىن. الايدا، بۇل اقپارات جالعان بولىپ، قاناتتىڭ جەكپە- جەگى مامىردىڭ 23 - كۇنى كولومبيادا ءوتتى.
مەيلى، ايقاس قاي كۇنى، قاي ەلدە وتسە دە، قانات باۋىرىمىز كەزەكتى جەڭىسىنە قول جەتكىزدى. 11 راۋنتقا جوسپارلانعان لاتىن امەريكاسىنىڭ چەمپيوندىق بەلدىگىن قورعاۋ بارىسىندا قارسىلاسى كولومبيالىق فرانسيسكو كوردەرونى ەكىنشى راۋنتتا نوكۋتقا جىبەرىپ، ءوز اتاعىن قورعاپ قالدى.
سونىڭ ناتيجەسىندە قانات ءوزىنىڭ 17-جەڭىسىنە قول جەتكىزدى. بۇنىڭ 14 نوكاۋت. ال كولومبيالىق قارسىلاسى وسىعان دەيىن، جالپى دەيىن 31 كەزدەسۋ وتكىزگەن. ونىڭ 29 ىندا جەڭىسكە جەتكەن (21نوكاۋت) ، ەكى كەزدەسۋدە نوكاۋتپەن جەڭىلگەن. بۇل جولى قازاق بالاسىنىڭ ءزىل بالعا جۇدىرىعىنان ەسىنەن تانىپ، جەكپە- جەگىن مەرزىمىنەن بۇرىن اياقتادى.
ال، جەرلەسىمىز قانات وسى جەڭىسىنىڭ ارقاسىندا رەيتينگتە 11- ورىننان، 8-ورىنعا كوتەرىلدى. بۇل دەگەنىڭىز الەم چەمپيونى اتاعىنا تالاسۋعا ءبىر تابان جاقىنداپ قالدى دەگەن ءسوز.
حوش! رەتى كەلگەندە ايتا كەتەيىك. گەننادي گولوۆكين جەكپە- جەككە شىعاردان 2-3-اي بۇرىن كىممەن، قاي كۇنى، قاي جەردە، قانداي ستاديوندا شارشى الاڭعا شىعاتىنى تۋرالى تولىق اقپارات الىپ ۇلگەرەمىز (بۇل جەردە، بىرەۋدى ۇلتقا، رۋعا بولۋدەن اۋلاقپىز، سالىستىرمالى تۇردە قاراستىرىپ كورىڭىز) . ال، سوڭعى كەزدەرى وتاندىق ب ا ق وكىلدەرى قاناتتىڭ جەكپە- جەكتەرى تۋرالى دۇرىس ءارى ناقتىلى اقپارات بەرمەيتىن بولدى. ءتىپتى، بۇل جولعى 17-جەكپە- جەكتەگى جەڭىسىن جارىتىپ جازعان ەشكىمدى دە كەزدەستىرمەدىك.
سوندا، بوكسشىنىڭ قاي ۋاقىتتا، كىممەن شىعىتىنى تۋرالى اقپاراتتى پروموۋتەرى نەلسون مەلدەس جاسىراما؟ ! جوق، قازاق ءتىلدى وتاندىق ب ا ق وكىلدەرىن قانداسىمىز قاناتتىڭ جەڭىستەرى قىزىقتىرماي ما؟ وسى سۇراق كىمدى بولسا دا مازالايتىنى داۋسىز. ولاي بولسا، قانداسىمىز قاناتتىڭ جارقىن جەڭىستەرى تۋرالى ناقتىلى اقپاراتپەن وقىرماندارىمىزدى ساعىندىرماي، سۋسىنداتىپ تۇرۋعا تىرىسايىق.
