17:05, 28 - مامىر 2014 | GMT +5
ەلوردا كۇنىندە قازاقستان رەسپۋبليكاسىنىڭ ۇلتتىق مۋزەيى اشىلادى
استانا. قازاقپارات - استانا كۇنىندە قازاقستان رەسپۋبليكاسىنىڭ ۇلتتىق مۋزەيى اشىلادى. بۇل تۋرالى كەشە ورتالىق كوممۋنيكاتسيالار قىزمەتىندەگى بريفينگتە ق ر مادەنيەت ءمينيسترى ارىستانبەك مۇحامەدي ۇلى ءمالىم ەتتى.
«6 - شىلدەدى قازاقستان رەسپۋبليكاسىنىڭ ۇلتتىق مۋزەيى اشىلادى.
ول الەمدەگى ەڭ ءىرى مۋزەيلەردىڭ ءبىرى بولماق، ياعني تەك كولەمى جاعىنان عانا ەمەس، ماعىنالىق تۇرعىدان الىپ قاراعاندا ماڭىزدى نىسان. وسىندا كونە داۋىردەن باستاپ، قازىرگى قازاقستاننىڭ تاريحىنا دەيىنگى ارالىق قامتىلادى» ، - دەدى مينيستر.
ۆەدومستۆو باسشىسى مۋزەيدە 14 زال بار ەكەنىن جانە ولاردا ەلىمىزدىڭ تاريحىنان سىر شەرتەتىن قۇندى جادىگەرلەر قويىلعانىن اتاپ ءوتتى.
«بۇل مۋزەيدىڭ ەرەكشەلىگىنە توقتالاتىن بولساق، ارينە، ءبىز تاۋەلسىزدىك العاننان بەرگى ءوزىمىزدىڭ جەتىستىكتەرىمىزدى كەڭىنەن كورسەتۋىمىز كەرەك. اتاپ ايتقاندا، سپورتتىق، عىلىمي، ءبىلىم، ونەركاسىپتىك جانە باسقا دا كوپتەگەن جەتىستىكتەر وسى جەردە كورسەتۋىمىز قاجەت» ، - دەدى ا. مۇحامەدي ۇلى.
