قىزىلوردادا قاجىمۇقان مۇڭايتپاس ۇلى اتىنداعى سپورت كلۋبى اشىلدى

قىزىلوردا. قازاقپارات -  قىزىلوردادا قاجىمۇقان مۇڭايتپاس ۇلى اتىنداعى سپورت كلۋبى اشىلدى.

بۇل جونىندە قالا اكىمى جانىنداعى جاستار ساياساتىن ىسكە اسىرۋ جونىندەگى كەڭەس وتىرىسىندا قالالىق دەنە شىنىقتىرۋ جانە سپورت ءبولىمىنىڭ باسشىسى اسىلجان جامانقۇل حابارلادى.

سالا باسشىسىنىڭ ايتۋىنشا، قالالىق بيۋدجەتتەن بولىنگەن 11 ميلليون تەڭگەگە قاجىمۇقان مۇڭايتپاس ۇلى اتىنداعى سپورت كلۋبى اشىلدى. كلۋب 15 سپورت ءتۇرى بويىنشا 1000عا جۋىق قالا تۇرعىنىنا تۇراقتى قىزمەت كورسەتەدى.

سپورت كلۋبىنىڭ مىندەتى - قالالىق، وبلىستىق، رەسپۋبليكالىق، حالىقارالىق سپورتتىق شارالاردى ۇيىمداستىرۋ، جاستاردىڭ بارلىق سپورت تۇرلەرىمەن اينالىسۋىنا مۇمكىندىك بەرۋ.

مۇنان وزگە، جىل ىشىندە وبلىستىق جانە قالالىق بيۋدجەتتەن بولىنگەن 534 ميلليون تەڭگەگە 37 سپورت الاڭى مەن بالالار ويىن الاڭدارى پايدالانۋعا بەرىلىپ، تاسبوگەت كەنتىندە سالىناتىن سپورتتىق ساۋىقتىرۋ كەشەندەرىنىڭ جوبا- سمەتالىق قۇجاتتارى ازىرلەنەدى.

سالىناتىن بالالار ويىن جانە سپورت الاڭدارىنىڭ ەرەكشەلىگى مۇمكىندىگى شەكتەۋلى بالالار ءۇشىن قولجەتىمدى بولماق.

سونداي-اق، وبلىستىق فۋتبول فەدەراتسياسىنىڭ قولداۋىمەن قالاداعى 3 مەكتەپكە شاعىن فۋتبول الاڭدارى سالىنۋدا.

جالپى ەسەپتى كەزەڭدە 34 قالالىق سپورتتىق ءىس-شارالار، وبلىستىق سايىستار الدىندا 19 وبلىستىق وقۋ-جاتتىعۋ جيىنى وتكىزىلدى. وبلىستىق، رەسپۋبليكالىق دەڭگەيدەگى جارىستارعا بارلىعى 17789 جاس قاتىستىرىلعان.

اۆتور: ەلۋباي اۋەزوۆ