ديرەكتور مەكتەپ «اتاماندارىن» قولپاشتاپ وتىرعان

استانا. قازاقپارات - وڭتۇستىك قازاقستان وبلىسىنداعى ارنايى مەكتەپ-ينتەرناتىنىڭ ديرەكتورى جۇمىستان كەتتى.

سەبەبى ول بالالار اراسىنداعى بەيرەسمي كوشباسشىلاردى قولپاشتاپ، سول ارقىلى مەكتەپ ىشىندەگى ءتارتىپتى ساقتاۋعا تىرىسقان، دەپ حابارلايدى Tengrinews.kz ءتىلشىسى باس پروكۋراتۋراعا سىلتەمە جاساپ.

قاداعالاۋ ورگانى وتكىزگەن تەكسەرىستەرگە سايكەس، ونداي مەكەمەلەردىڭ كەيبىر باسشىلارى جەسوسپىرىمدەردىڭ ءتارتىبىن قاداعالاي المايدى.

«ماسەلەن، وڭتۇستىك قازاقستان وبلىسىنداعى مەكتەپ-ينتەرناتىنىڭ ديرەكتورى ءتارتىپتى ساقتاۋ ماقساتىندا بالالار اراسىنداعى بەيرەسمي كوشباسشىلاردىڭ زاڭسىز ارەكەتتەرىن قولداپ كەلگەن. مەكتەپ «اتاماندارى» ساباققا بارماي، ءوز ەركىمەن مەكەمە اۋماعىنان تىس جەرگە شىعىپ ءجۇردى. وعان قوسا، ولار مەكتەپ عيماراتىندا توبەلەسكە بەيىمدەلگەن ءيتتى ۇستاعان. ينتەرناتتىڭ وزگە شاكىرتتەرى دە سولاردىڭ ىقپالىنا تۇسكەن»، - دەلىنگەن رەسمي حابارلامادا.

وسىعان بايلانىستى مەكەمە ديرەكتورى جۇمىستان بوساتىلدى.

ايتا كەتەيىك، بۇگىندە رەسپۋبليكا بويىنشا ءتارتىپسىز بالالارعا ارنالعان 9 مەكتەپ-ينتەرناتى بار. سونىڭ بىردە-بىرەۋى وزىنە جۇكتەلگەن مىندەتتى ويداعىداي اتقارىپ جاتقان جوق. بالالاردىڭ ءبىلىم الۋ مەن دەنساۋلىقتى ساقتاۋ سالاسىنداعى كونستيتۋتسيالىق قۇقىقتارى ساقتالمايدى.

تەكسەرىستەر كەزىندە مەكتەپكە بوتەن ادامداردىڭ ءجيى كەلەتىنى، سونداي- اق بالالاردىڭ ءوز ەركىمەن باسقا جاققا كەتىپ قالاتىنى انىقتالدى.