قازاقستاندا تۇڭعىش رەت كونكيمەن جۇگىرۋ سپورتىنان كاسىبي كوماندا قۇرىلادى
«استانا» ۆەلوكومانداسىنىڭ ۇلگىسى بويىنشا جۇزەگە اسىرىلاتىن جوبانى ەكى تاراپ تەڭ دارەجەدە قارجىلاندىرماق. قارجىلىق ينۆەستيتسيادان بولەك، گوللانديالىقتار جوباعا سپورتتىق مەديتسينا، جاتتىقتىرۋشىلار مەن مەنەدجمەنت ماماندارىن دايارلاۋ سالاسىنداعى بىلىمدەرىن ەنگىزبەك.
سونىمەن قاتار، مەموراندۋم بويىنشا تاراپتار الداعى ۋاقىتتا ەلىمىزدەگى كونكيمەن جۇگىرۋ سپورتىن دامىتۋ باعدارلاماسىندا بىرلەسە جۇمىس ىستەيدى. ونىڭ ىشىندە، سپورتتىق ينفراقۇرىلىمدى دامىتۋ باعدارلاماسى دا جوسپارلانادى.
جاڭا كوماندانىڭ نەگىزگى ماقساتى - قازاقستاندىق سپورتشىلاردى 2018-جانە 2022-جىلدارى وتەتىن وليمپيادا ويىندارى مەن الەم چەمپيوناتىنا دايىنداۋ. ءبىرىنشى كەزەكتە 2015-جىلى «الاۋ» مۇزايدىنىندا وتەتىن سپرينتتىك جارىستان الەم چەمپيوناتىندا ۇزدىك ناتيجە كورسەتۋ.
جوبا رەسمي تۇردە 2014-جىلدىڭ 26-مامىرىندا باستالادى. ارىپتەستىك 2022-جىلعا دەيىن سوزىلادى. قازاقستاندىق تاراپتان سپورت جانە دەنە شىنىقتىرۋ ىستەرى اگەنتتىگى مەن ۇلتتىق كونكيمەن جۇگىرۋشىلەر فەدەراتسياسى، ال نيدەرلاند تاراپىنان 4SKATING كومانداسى قاتىسادى.
بۇل كومانداعا 1988-جىلعى ءۇش دۇركىن وليمپيادا چەمپيونى يۆونن ۆان گەننيپ پەن 1992-جىلعى وليمپيادا چەمپيونى بارت ۆەلدكامپ جەتەكشىلىك ەتەدى.
