پرەزيدەنتكە ە ا ە ك وتىرىسىنا دايىندىق جونىندە باياندالدى

استانا. قازاقپارات - ەلباسى جوعارى ەۋرازيالىق ەكونوميكالىق كەڭەستىڭ مەملەكەت باسشىلارى دەڭگەيىندەگى وتىرىسىن وتكىزۋگە دايىندىق ماسەلەلەرى جونىندە كەڭەس وتكىزدى، دەپ جازادى اقوردانىڭ رەسمي سايتى.

جيىندى اشقان مەملەكەت باسشىسى وسى اپتادا ەۋرازيالىق ەكونوميكالىق وداق قۇرۋ تۋرالى شارتقا قول قويۋ جوسپارلانىپ وتىرعانىن ايتتى.

- ءبىز جيىرما جىل بويى ەكونوميكالىق ينتەگراتسيا باعىتىندا ىلگەرىلەدىك. وسى ۋاقىتقا دەيىن وراسان جۇمىس اتقارىلدى. ەندى سول جۇمىسىمىزدىڭ بەكەر بولماعانىن، قول قويىلعان شارتتىڭ حالىق يگىلىگىنە ارنالعانىن ءىس جۇزىندە دالەلدەۋگە ءتيىسپىز.

ەلىمىز ۇزاق مەرزىمدى بولاشاققا جوسپارلانعان بۇل وداقتان پايدا كورەدى. ءبىز شارتقا ەكونوميكالىق تۇرعىدان ءتيىمدى بولعاندىقتان قول قويۋعا ۇمتىلىپ وتىرمىز. اتاپ ايتساق، ءبىزدىڭ ەلىمىزدىڭ تەڭىزگە شىعاتىن جولى جوق ەكەنىن ەسكەرۋ كەرەك، مۇنى جانە كولىك ينفراقۇرىلىمىنا قول جەتىمدىلىكتى كورشىلەرىمىز قامتاماسىز ەتەتىن بولادى، - دەپ اتاپ ءوتتى قازاقستان پرەزيدەنتى.

مەملەكەت باسشىسى كورشىلەرىمىزبەن تىعىز ەكونوميكالىق بايلانىس قازاقستاننىڭ دامۋىنا وڭ اسەرىن تيگىزەتىندىگىن اتاپ ءوتتى.

- ءبىزدىڭ ەلىمىزدە شىعارىلعان تاۋارلار رەسەي مەن بەلارۋستىڭ نارىقتارىندا باسەكەگە ءتۇسۋى ءتيىس. قازاقستان تاۋارلارىنىڭ، كاپيتالىنىڭ، جۇمىس كۇشىنىڭ ەركىن قوزعالىسى، بىرلەسكەن كاسىپورىندار قۇرۋ، سونداي-اق بايلانىستاردى كۇشەيتۋ - وسىنىڭ ءبارى ەلىمىزدىڭ ەكونوميكاسىنا پايداسىن تيگىزەدى، - دەدى نۇرسۇلتان نازاربايەۆ.

پرەمەر-مينيستر ك. ءماسىموۆ ءوز بايانداماسىندا شارتتىڭ جوباسى قازاقستان پرەزيدەنتىنىڭ تاپسىرماسىنا سايكەس دايىندالعانىن جانە وندا اسا ماڭىزدى بىرنەشە ماسەلە قامتىلعانىن مالىمدەدى.

- وداق ءبىزدىڭ ەلىمىزگە قازىرگىدەي تۋربۋلەنتتى ەكونوميكا جاعدايىندا تۇراقتى ءارى ورنىقتى دامۋ ءۇشىن زور ەكونوميكالىق مۇمكىندىكتەر بەرەدى. بۇل شارتتا كوپ ۆەكتورلى ساياسات جۇرگىزۋ مۇمكىندىگى قاراستىرىلعان. وسى وداققا قاتىسۋدان بولەك، ءبىز د س ۇ-عا كىرۋ جونىندەگى كەلىسسوزدەردى جانە وزگە دە حالىقارالىق بىرلەستىكتەرمەن كەلىسىمدەر جاساۋدى جالعاستىرامىز، - دەدى پرەمەر-مينيستر.

ك. ءماسىموۆ جالپى قۇجاتتىڭ 4 بولىكتەن، 28 بولىمنەن، 118 باپتان جانە 32 قوسىمشادان تۇراتىنىن دا اتاپ ءوتتى.

پرەمەر-ءمينيستردىڭ ءبىرىنشى ورىنباسارى ب. ساعىنتايەۆ بۇگىنگى تاڭدا ۇكىمەتتىڭ ءتيىستى قاۋلىسىن كەلىسىمدەۋ مەن قابىلداۋدىڭ مەملەكەتىشىلىك راسىمدەرى اياقتالعانىن مالىمدەدى.

- شارت جوباسى تاۋەلسىز ساراپشىلاردىڭ ساراپتاماسىنان ءوتتى. ءسىزدىڭ ۇستانىمىڭىز بەن تاپسىرمالارىڭىزدى باسشىلىققا الا وتىرىپ، شارت جوباسىمەن جۇمىس بارىسىندا ەكونوميكالىق ەمەس ەرەجەلەر الىنىپ تاستالدى.

كەلىسسوزدەر بارىسىندا ءبىز وداقتى ساياسيلاندىرۋعا جانە ونىڭ اياسىندا ۇلتتىق وكىلەتتىلىك پەن مەملەكەتتىك ەگەمەندىك ماسەلەلەرىن تالقىلاۋعا بولمايتىندىعى تۋرالى ۇستانىمدى قورعاپ قالدىق. ءسىزدىڭ نۇسقاۋلارىڭىز بەن تاپسىرمالارىڭىز جۇزەگە اسىرىلعانىن، شارت جوباسى تاراپتارمەن كەلىسىلىپ، قول قويۋعا دايىن ەكەنىن تاعى ءبىر رەت اتاپ وتكىم كەلەدى، - دەدى ب. ساعىنتايەۆ.

سىرتقى ىستەر ءمينيسترى ە. ىدىرىسوۆ شارت جوباسىنىڭ ينستيتۋتسيونالدىق بولىگىندە ەگەمەندىكتى، اۋماقتىق تۇتاستىقتى، ءاربىر مۇشە-مەملەكەتتىڭ ساياسي قۇرىلىمىنىڭ ەرەكشەلىگىن قۇرمەتتەۋ، سونداي-اق شەشىم قابىلداۋداعى كونسەنسۋس قاعيداتتارى قاراستىرىلعانىن ايتتى.

- وداق ورگاندارىندا مۇشە-مەملەكەتتەر وكىلدەرىنىڭ كونكۋرستىق نەگىزدە تەڭ بولۋى قامتاماسىز ەتىلدى. بۇل شارتتىڭ وزگە حالىقارالىق شارتتاردى جاساۋعا كەدەرگى كەلتىرمەيتىنى ايرىقشا ماڭىزدى. ينستيتۋتسيونالدىق بولىكتە تۋىنداعان بارلىق تۇيتكىلدەر جويىلدى، - دەدى ە. ىدىرىسوۆ.