استانادا ءوتىپ جاتقان ارالاس جەكپە-جەكتە يسپاندىق سپورتشى توبەلەس الدىندا قاشىپ كەتتى
مۇنداي جاعداي M-1 Global تۋرينىنىڭ 16 جىلدىق تاجىريبەسىندە ءبىرىنشى رەت بولىپ تۇر - ارەناعا شىعايىن دەپ تۇرعان يسپاندىق سپورتشى جەمە-جەمگە كەلگەندە قاشىپ كەتتى، دەپ حابارلايدى mixfight.ru.
ۆيترۋكپەن جەكپە-جەككە شىعۋعا ءوزى كەلىسىم بەرگەن، كەلىسىم شارتقا ءوز قولىمەن قول قويعان، قازاقستانعا ءوز ەركىمەن كەلگەن رومەرو بارلىق سپورتشىلاردىڭ ارەناعا شىعۋىنا 10 مينۋت قالعاندا جوق بولىپ كەتتى. قوناقۇيدەن شىعىپ، باپكەرلەردەن جاسىرىنىپ، تەلەفونىن دا ءوشىرىپ تاستاپتى.
بەيتانىس ەلدە اداسىپ كەتكەن شىعار دەگەن قاۋىپپەن سپورتشىنى ىزدەۋگە بىردەن پوليتسيا كىرىستى. ءبىراق ودان دا دىم شىقپادى. باپكەرى يسپانياداعى تۋعان-تۋىستارىنا دا حابارلاستى، ءبىراق ول جاقتاعىلار دا بەيحابار. ايتەۋىر تۇنگى ۇشتەر شاماسىندا ول اۋەجايدان تابىلدى. وندا جاياۋ جەتىپ، سول جەردەن يسپانياعا ۇشىپ كەتپەك بولعان ەكەن. الايدا ءوزىنىڭ بۇل قىلىعىن اۋىر پسيحولوگيالىق جاعدايدا تۇرعان سپورتشى تۇسىندىرە المادى.
يسپاندىق كوماندانىڭ باپكەرى مۇنداي جاعدايعا ءبىرىنشى رەت تاپ بولىپ تۇرعانىن ايتتى. M-1 Global كومپانياسى قىزۋ توبەلەس ۇيىمداستىرۋ ءۇشىن بار كۇشىن سالدى، الايدا رەسەيدە ەكى مارتە جەڭىسكە جەتكەن رومەرو بۇل جولى توبەلەسكە شىعار الدىندا قاشىپ كەتەتىنىن كىم ءبىلىپتى.
