سۋ رەسۋرستارىن ترانسشەكارالىق تۇرعىدا ءتيىمدى باسقارۋ - ورتالىق ازيا ەلدەرى دامۋىنىڭ ءبىر قاينارى
بۇل تۋرالى بۇگىن الماتىدا ورتالىق ازيانىڭ سۋ رەسۋرستارىنا قاتىستى ءوتىپ جاتقان ايماقتىق كونفەرەنتسيا بارىسىندا حالىقارالىق «ورتالىق ازياداعى سۋ رەسۋرستارىن ترانسشەكارالىق باسقارۋ» باعدارلاماسىنىڭ مامانى مايا نۇرمامەدوۆا مالىمدەدى.
ونىڭ ايتۋىنشا، ورتالىق ازيادا سۋ رەسۋرستارى شەكتەۋلى. سوندىقتان ولاردى ترانسشەكارالىق تۇرعىدا ءتيىمدى باسقارۋ - ورتالىق ازيا ەلدەرىنىڭ قاۋىپسىزدىگى مەن ەكونوميكالىق تۇراقتىلىعىنا دا ەلەۋلى تۇردە اسەر ەتەدى.
«ورتالىق ازيادا سۋ رەسۋرستارىن ترانسشەكارالىق باسقارۋ» باعدارلاماسى 2012 - جىلى قولعا الىنعان بولاتىن. ونى گەرمانيانىڭ حالىقارالىق ىنتىماقتاستىق بويىنشا قوعامى (GIZ) جۇزەگە اسىرۋدا. اتالمىش باعدارلاما ەۋروپالىق وداقتىڭ «ورتالىق ازياداعى سۋ شارۋاشىلىعى جانە باسسەيندىك ۇيىمدارعا قولداۋ كورسەتۋ» اتتى جوباسى اياسىندا ءبىرقاتار جەتىستىكتەرگە قول جەتكىزدى. ءبىز قازىر ورتالىق ازيادا باسسسەيندىك جوسپارلاۋ جۇيەسىن ەنگىزىپ جاتىرمىز.
ەگەر كەڭەس زامانىندا ءبىرىنشى كەزەكتە سۋ رەسۋرستارى ماڭايىنداعى حالىق سانى مەن ەگىستىك كولەمى قاراستىرىلسا، ەندى ءبىرىنشى كەزەكتە سۋ رەسۋرستارىنىڭ قولدا بار كولەمى ەسكەرىلەدى. وسى باعىتتا ءبىز ءۇش باسسەيندە: ارال - سىرداريا (قازاقستان، وزبەكستان، تاجىكستان جانە قىرعىزستان) ، يسفارا (قىرعىزستان، تاجىكستان) جانە مۋرگاب (تۇركىمەنستان، اۋعانستان) وزەندەرى باسسەيىندەرىندە سۋ رەسۋرستارىن باسقارۋدىڭ حالىقارالىق تاجىريبەلەرىن ەنگىزدىك. باعدارلاما بيىل شىلدە ايىندا اياقتالادى. ونىڭ ءارى قاراي جالعاسۋى - بۇگىنگى كونفرەنتسياعا تىكەلەي بايلانىستى» - دەدى ءوز سوزىندە مايا نۇرمامەدوۆا.
ەستەرىڭىزگە سالا كەتەيىك، «ورتالىق ازياداعى سۋ رەسۋرستارىن باسقارۋدىڭ كەلەشەگى: باسسەيندىك تاسىلدەمەدەن ايماقتىق ىنتىماقتاستىققا دەيىن» دەپ اتالاتىن بۇگىنگى كونفەرەنتسيا ەكى كۇنگە سوزىلادى.
القالى جيىنعا ورتالىق ازياداعى بەس مەملەكەتتىڭ سۋ شارۋاشىلىعى ۇيىمدارى جانە سۋ رەسۋرستارىن باسقارۋ سالاسىنداعى حالىقارالىق ۇيىمداردىڭ وكىلدەرى، سونىمەن قاتار ەۋروپالىق وداق پەن گەرمانيا سىرتقى ىستەرى مينيسترلىگىنىڭ وكىلدەرى قاتىسۋدا.
اۆتور: جاپپاربەرگەن ايبوتا
