وليمپيادا چەمپيونى ەرماحان ىبىرايىموۆ پەن ءانشى قايرات نۇرتاس جارىسادى

استانا. قازاقپارات - بۇگىن تانىمال قازاقستاندىق وليمپيادا چەمپيونى ەرماحان ىبىرايىموۆ پەن ءانشى قايرات نۇرتاس اسىق اتۋدان رەسپۋبليكالىق تۋرنيرگە قاتىسادى، دەپ حابارلايدى ۇلتتىق سپورت تۇرلەرى فەدەراتسياسىنىڭ باسپا ءسوز قىزمەتىنە سىلتەمە جاساعان kazsporttv.kz.

جارىس 25 - مامىردا استاناداعى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ سپورت كەشەنىندە وتەدى.

شاقىرىلعان قوناقتاردىڭ اراسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك، ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، قوعام قايراتكەرى قويشىعارا سالعارين بار.

سونىمەن قاتار، انشىلەر قىدىرءالى بولمانوۆ پەن دوسىمجان تاڭاتاروۆ كورسەتىلىمدى تۋرنيردە باق سىنايدى.

اسىق اتۋدان رەسپۋبليكالىق چەمپيوناتقا ەلىمىزدىڭ بارلىق ءوڭىرىنىڭ كوماندالارى قاتىسادى. ءار كوماندادا ءۇش ادامنان بولۋى كەرەك. بىرەۋىنىڭ جاسى 16 عا تولماعان، ەكىنشىسى - 16 دان جوعارى، ال ءۇشىنشىسى - جاتتىقتىرۋشى.

ءبىرىنشى ورىن العان كومانداعا 300 مىڭ تەڭگە، ەكىنشى ورىنعا 200 مىڭ تەڭگە جانە ءۇشىنشى ورىنعا 100 مىڭ تەڭگە بەرىلەدى.