10:07, 27 - مامىر 2014 | GMT +5
ەلباسى ليتۆا پرەزيدەنتىن لاۋازىمىنا قايتا سايلانۋىمەن قۇتتىقتادى
استانا. قازاقپارات - قازاقستان پرەزيدەنتى نۇرسۇلتان نازاربايەۆ ليتۆا رەسپۋبليكاسىنىڭ پرەزيدەنتى داليا گريباۋسكايتەگە پرەزيدەنتتىك لاۋازىمعا قايتا سايلانۋىنا بايلانىستى قۇتتىقتاۋ جەدەلحاتىن جولدادى.
بۇل تۋرالى اقوردانىڭ باسپا ءسوز قىزمەتىنەن حابارلادىن.
مەملەكەت باسشىسى قۇتتىقتاۋىن قازاقستان حالقىنىڭ جانە جەكە ءوزىنىڭ اتىنان جولدادى.
نۇرسۇلتان نازاربايەۆ داليا گريباۋسكايتەنىڭ كوشباسشىلىق مول تاجىريبەسى ليتۆانىڭ دامۋىنا ايتارلىقتاي سەرپىن بەرەتىندىگىنە سەنىم ءبىلدىردى.
«ءسىزدىڭ قايتا سايلانۋىڭىز دوستىق جانە ءوزارا تۇسىنىستىك نەگىزىندە قالىپتاسقان ەكىجاقتى ىنتىماقتاستىقتى ءارى قاراي نىعايتۋعا سەپتىگىن تيگىزەتىنىنە كامىل سەنەمىن» ، - دەلىنگەن جەدەلحاتتا.
سوڭىندا قازاقستان پرەزيدەنتى ليتۆا رەسپۋبليكاسىنىڭ پرەزيدەنتىنە زور دەنساۋلىق، قاجىماس قايرات، اسا جاۋاپتى قىزمەتتە تابىس، ال دوستاس ليتۆا حالقىنا بىرلىك پەن باق- بەرەكە تىلەدى.
