21:25, 23 - مامىر 2014 | GMT +5
ن. نازاربايەۆ ق ح ر ءتوراعاسىنا ۇرىمجىدەگى لاڭكەستىك اكتىگە بايلانىستى كوڭىل ايتۋ جەدەلحاتىن جولدادى
استانا. قازاقپارات - ەلباسى نۇرسۇلتان نازاربايەۆ قىتاي حالىق رەسپۋبليكاسىنىڭ ءتوراعاسى شي جينپيڭگە ءۇرىمجى قالاسىنداعى لاڭكەستىك اكتىگە بايلانىستى كوڭىل ايتۋ جەدەلحاتىن جولدادى، دەپ حابارلادى اقوردانىڭ باسپا ءسوز قىزمەتى.
جەدەلحاتتا نۇرسۇلتان نازاربايەۆ ءۇرىمجى قالاسىندا 22 - مامىردا بولعان لاڭكەستىك اكتى سالدارىنان كوپتەگەن ادامداردىڭ قۇربان بولعانى جانە زارداپ شەككەنى تۋرالى سۋىت حاباردى تەرەڭ كۇيزەلىسپەن قابىلداعانىن اتاپ وتكەن.
مەملەكەت باسشىسى ق ح ر ءتوراعاسى شي جينپيڭگە، سونداي-اق قازا بولعانداردىڭ تۋىستارى مەن جاقىندارىنا كوڭىل ايتتى، زارداپ شەككەندەردىڭ بارلىعىنا تەزىرەك ساۋىعىپ كەتۋىنە تىلەكتەستىگىن ءبىلدىردى.
«قازاقستان ءبىزدىڭ ەلدەرىمىزدىڭ بەيبىت ءومىرى مەن قاۋىپسىزدىگىن قامتاماسىز ەتۋ ماقساتىندا قازىرگى زامانعى قاتەرلەرمەن كۇرەستە قىتايمەن تىعىز ىنتىماقتاستىققا ءارقاشان دا ءازىر ەكەنىن اتاپ كورسەتكىم كەلەدى»، - دەلىنگەن جەدەلحاتتا.
