ستاتيستيكا اگەنتتىگى قازاقستاندىقتاردىڭ ساۋىردەگى ورتاشا جالاقىسىن ەسەپتەدى

استانا. قازاقپارات - اعىمداعى جىلعى ساۋىردە ءبىر قىزمەتكەردىڭ ورتاشا ايلىق نومينالدى جالاقىسى 116927 تەڭگەنى قۇرايدى، دەپ حابارلادى ق ر ستاتيستيكا اگەنتتىگى.

ءداستۇر بويىنشا ەڭ جوعارى جالاقى تاۋ-كەن وندىرەتىن ونەركاسىپ جانە كەن ورنى جۇمىسكەرلەرىندە - 254,9 مىڭ تەڭگە (ورتاشا رەسپۋبليكالىق دەڭگەيدەن 2,2 ەسەگە كوپ) ، قارجىلىق جانە ساقتاندىرۋ قىزمەتى - 244,8 مىڭ تەڭگە (2,1 ەسە) جانە كاسىبي، عىلىمي جانە تەحنيكالىق قىزمەت- 219,0 مىڭ تەڭگە (1,9 ەسە). ەڭ تومەنى - اۋىل، ورمان جانە بالىق شارۋاشىلىعى قىزمەتكەرلەرىندە - 55,0 مىڭ تەڭگە، ەل بويىنشا ورتاشا كورسەتكىشتەن 53 پايىزعا تومەن.

وڭىرلىك بولىنىستە ەڭ جوعارى جالاقى ماڭعىستاۋ وبلىسىندا - 228,1 مىڭ تەڭگە، ورتاشا رەسپۋبليكالىق دەڭگەيدەن 2 ەسەگە اسىپ تۇسەدى. سولتۇستىك قازاقستان وبلىسىندا ونىڭ مولشەرى 74,4 مىڭ تەڭگە. بۇل ەل بويىنشا ورتاشا دەڭگەيدەن 36,3 پايىزعا تومەن.