قۇرالايدىڭ سالقىنى دا كەلدى

استانا. قازاقپارات - كيىكتەر ءوز قۇرالايلارىن اياقتاندىرىپ، وسى جەلگە قارسى جۇگىرتىپ، ورگىزەدى.

مامىردىڭ 20-جاڭاسىنان كۇيەك امالى باستالدى.

«بۇل ءتۇز اڭدارىنىڭ كۇيەككە تۇسۋىنە وراي بولاتىن قۇبىلىس.

وسى كەزدە بىرنەشە كۇنگە سوزىلعان سىلبىر جاڭبىر جاۋادى.

قارايتىن يەسى، جىلى ورنى جوق دالا اڭدارى ات كوزىنەن كەلەتىن كوك مايسانى پانالاپ تولدەيدى...» دەپ جازعانبىز وتكەن جولعى ماقالامىزدا.

مىنە، وسى امال مامىر ايىنىڭ اياعىندا سوعاتىن سۋىق جەل -  «قۇرالايدىڭ سالقىنىنا» ۇلاسادى. ويتكەنى، وسى جەلگە قارسى كيىك ءوز قۇرالايلارىن اياقتاندىرىپ، جۇگىرتىپ، ورگىزەدى.

ءبىر عاجابى، كيىك قانشا كوپ بولسا دا، ولار 2-3 كۇن ىشىندە تۇگەلدەي تولدەپ ۇلگەرەدى ەكەن. ءتۇز اڭدارىنىڭ تەز تولدەۋىنىڭ ءبىر سىرى -  انالىق كيىكتەر كەز كەلگەن قۇرالايدى ەمىزىپ، باۋىرىنا الا بەرەتىن كورىنەدى. كيىك قۇرالايىنىڭ دالادا جەتىم، جالعىز قالمايتىنى دا وسىدان بولسا كەرەك.

«قۇرالايدىڭ سالقىنى» - مامىردىڭ سوڭىندا اياقتالاتىن، 9-10 كۇنگە سوزىلاتىن امال. ەكپىنى قاراشا ءۇيدى جىققانداي قاتتى جەل تۇرىپ، ەرەكشە سالقىندىق ورىن الادى. كۇن نوسەرلەتىپ، كەي جىلدارى قار ارالاس جاڭبىر جاۋاتىن كورىنەدى. ون كۇندە كيىك لاعىن ورگىزىپ، جاڭبىرعا ساۋىرىن توسىپ، تازارادى.

قازەكەڭ بۇل امالدان دا ساقتانعان. ويتكەنى، «قۇرالايدىڭ سالقىنى» كەزىندە جەڭىل كيىممەن مال سوڭىندا جۇرگەن كەيبىر مالشىلاردىڭ سۋىققا ءۇسىپ مەرت بولعانى اۋىزشا تاريحتان ءمالىم. الداعى اپتادا - 22-28 - مامىردا، جوعارىداعى امالدىڭ اسەرىنەن كۇن سالقىندايدى، جاۋىن- شاشىن بولۋى عاجاپ ەمەس.

بۇل ورايدا تانىمال جۇلدىزشى نازاربەك قوجامسەيىتوۆ ءوز بولجامدارىن جاساعان ەكەن. «ەلىمىزدە مامىردىڭ 23، 24، 27 سى كۇندەرى قار بورايدى. جاساعان بولجامىم سولتۇستىك وڭىرلەر بويىنشا بولعاندىقتان، باسقا ايماقتاردا قار ارالاس جاڭبىر بولۋى مۇمكىن.

مامىردىڭ 27 سىنەن ماۋسىمنىڭ 5-6 سىنا دەيىن كۇن جىلىنبايدى. قورىتا ايتقاندا، جىلدىڭ العاشقى جارتىسى سۋىق بولادى. جاز كەش شىعادى...»، - دەيدى تابيعات تامىرشىسى.

Р.S. كۇننىڭ كۇرت سالقىنداپ، جاۋىن-شاشىننىڭ ورىن الۋى تاۋ بوكتەرىندەگى ساياجايلاردا وتىرعىزىلعان كوكونىس كوشەتتەرىنىڭ زاقىمدانۋىنا سەبەپكەر بولۋى مۇمكىن.

سوندىقتان، كوشەتتەردى كۇن وتكىزگىش جۇقا پلەنكالارمەن قىمتاپ جاپقان دۇرىس. تاۋعا شىعىپ، سەيىل قۇرۋدى توقتاتا تۇرعان ماقۇل. توتەنشە جاعدايلار ورگاندارى ەسكەرتپەلەرىنە قۇلاق اسقان ءجون...

 

سارسەنبەك بەكمۇرات ۇلى.

«الماتى اقشامى»