قوعامدىق كولىكتەرگە تەگىن ينتەرنەت ورناتىلدى

استانا. قازاقپارات - قوعامدىق كولىكتەردىڭ قىزمەتىن تۇتىناتىن تۇركىستان قالاسىنىڭ تۇرعىندارى بۇدان بىلاي تەگىن ينتەرنەتتى قولدانا الادى.

Beeline كومپانياسى   3G WiFi-روۋتەرلەردى - بۇكىل الەمدىك جەلىگە قوسىلۋ قۇرىلعىلارىن قالالىق اۆتوبۋستارعا ورناتا باستادى.

ياعني، اۆتوبۋس مىنگەن تۇركىستاندىقتار ۇشقىر ينتەرنەتكە كىرىپ، قاجەتتى مالىمەتىنە قول جەتكىزۋگە مۇمكىندىگى بار. بۇگىنگى كۇنى ارنايى قۇرىلعىمەن جابدىقتالعان بىرنەشە قوعامدىق كولىك قالادا ءجۇر.

مامانداردىڭ ايتۋىنشا الداعى ۋاقىتتا ولاردىڭ سانىدا ارتپاق.

قىرمىزى تورەباي، Beeline قازاقستان كومپانياسىنىڭ قوعاممەن بايلانىس جونىندەگى РR مەنەدجەرى:

- قوعامدىق كولىكتەردەگى «WiFi-Bus» تولىقتاي الەۋمەتتىك جوبا، رەسەيدە بار، ال قازاقستاندا Beeline كومپانياسى العاش قولعا الدى.

ينتەرنەتكە قوسىلۋ ءۇشىن WiFi قولدانۋ مۇمكىندىگى بار - سمارتفون، پلانشەت نەمەسە نوۋتبۋك قاجەت. قالا تۇرعىندارى مۇنداي ەرەكشە اۆتوبۋستاردى سىرتىنداعى اسەم جارنامالارى ارقىلى بىلسە، ىشىنە كىرگەن سوڭ توبەگە ىلىنگەن ارنايى كودتى تەرىپ، قىزمەتتى تۇتىنا الادى.

اسقاربەك قازبەكوۆ، Beeline قازاقستان كومپانياسىنىڭ شىمكەنت بولىمشەسىنىڭ ديرەكتورى:

- قانداي بايلانىس وپەراتورىنا قوسىلعانىنا قاراماستان بارلىق جۇرگىنشىلەر ينتەرنەتكە تەگىن قوسىلا الادى. Beeline قازاقستان كولىكتەگى ۋاقىتتى ءتيىمدى وتكىزۋگە، جاڭالىقتاردى قاراپ، پوشتانى تەكسەرۋگە، اۋا-رايىن ءبىلىپ، الەۋمەتتىك جەلىلەردە سويلەسۋگە جانە سۇيىكتى كىتابىڭىزدى وقۋعا شاقىرادى. تۇركىستان قالاسىنىڭ تۇرعىندارى ءبىزدىڭ باستامامىزدى باعالايدى جانە Beeline ينتەرنەتى جۇرگىنشىلەر اراسىندا جوعارى سۇرانىسقا يە بولادى دەپ ۇمىتتەنەمىز.

باسپا ءسوز ءماسليحاتى بارىسىندا تۇركىستان قالاسى اكىمىنىڭ ورىنباسارى داۋرەن تاڭىربەرگەنوۆتىڭ ينتەرنەت جەلىسى بۇدان بىلاي تەك اۆتوبۋستاردا ەمەس، حالىق كوپ جينالاتىن ايالدامالارعا، ساياباقتارعا دا ورناتىلسا دەگەن ۇسىنىسى كوپشىلىك تاراپىنان قولداۋ تاپتى.

سالا ماماندارى جۋرناليستەر مەن بلوگلەردىڭ سۇراقتارىنا كەڭ كولەمدى جاۋاپ بەردى. سودان سوڭ، WiFi قۇرىلعىسى ورناتىلعان اۆتوبۋسپەن قالانى ارالاپ، عالامتورعا ەنىپ، جوبامەن تانىستى.

«WiFi-Bus» رەسپۋبليكالىق جوباسى باستاپقى دا «سىناقتىق رەجيم» رەتىندە پەتروپاۆل قالاسىندا جۇزەگە اسقان. كەيىننەن جوباعا كوكشەتاۋ جانە تۇركىستان قالالارى ەنىپتى. الداعى ۋاقىتتا باستاما شىمكەنت، قاراعاندى، ورال، قوستاناي، اتىراۋ جانە ەلىمىزدىڭ باسقا دا قالالارىندا ىسكە اسپاق.

 

اۆتور: نۇرشات توكەن.

«الاش ايناسى»