نازاربايەۆ كەدەيلەر مەن بايلار ماسەلەسىن كوتەردى
پرەزيدەنتتىڭ ايتۋىنشا، قازىرگى ەكونوميكالىق تۇراقسىزدىق جاعدايىندا دامۋشى ەلدەردەن دامىعان مەملەكەتتەرگە اعىلاتىن كاپيتالدىڭ كولەمى ارتادى دەگەن بولجام بار.
سونىڭ سالدارىنان دامۋشى ەلدەردەگى ينۆەستيتسيالار 50 پايىزعا دەيىن ازايۋى ابدەن مۇمكىن. «وعان قوسا، كەدەيلەر مەن بايلاردىڭ ءومىر ءسۇرۋ دەڭگەيلەرى ءبىر-بىرىنەن الشاقتاپ بارادى. ونداي جاعداي الەۋمەتتىك شيەلەنىستەردى كۇشەيتىپ وتىر.
حالىقارالىق زەرتتەۋگە سايكەس، 2014 - جىلدا الەمدىك ماسەلەلەردىڭ تىزىمىندە كەدەيلەر مەن بايلاردىڭ تەڭسىزدىگى ءۇشىنشى ماڭىزدى پروبلەماعا اينالدى. ول ەۋروپا ەلدەرىنە دە ءتان»، - دەيدى ن. نازاربايەۆ.
حالىقارالىق ەڭبەك ۇيىمىنىڭ مالىمەتىنە سايكەس، وتكەن جىلى 200 ميلليون جۇمىسسىزداردىڭ قاتارىنا تاعى 5 ميلليون ادام قوسىلدى.
«قازىرگى جاعدايدا قاراپايىم حالىقتىڭ ءال-اۋقاتىن ۇمىتپاۋ قاجەت. بۇگىن الەم بويىنشا 1,5 ميللياردقا جۋىق ادام كۇنىنە ءبىر-اق دوللارعا ءومىر سۇرەدى. ال شامامەن 2,5 ميلليارد ادام ءبىر كۇندە 2 دوللاردان دا از اقشا الادى. بۇل - جەر-جاھانداعى حالىقتاردىڭ 40 پايىزى. افريكا مەن ازيانىڭ كوپتەگەن ەلدەرى وسىنداي پروبلەماعا تاپ بولىپ وتىر.
ال ونى كۇندەلىكتى نورما رەتىندە قابىلداۋدىڭ كەسىرىنەن مەملەكەتتەردى، تۇتاس ءبىر ايماقتاردى تىعىرىققا تىرەپ جاتادى»، - دەدى مەملەكەت باسشىسى. پرەزيدەنتتىڭ سوزىنە قاراعاندا، بۇگىنگى تاڭدا جەر شارى تۇرعىندارىنىڭ تەك 1 اق پايىزى عانا الەم بايلىقتارىنىڭ 40 پايىزىنا يەلىك ەتۋدە. 3 اق پايىزىن ادامزاتتىڭ 70 پايىزى يگەرىپ وتىر. «بۇنداي جاعداي جاھاندىق دامۋعا كەدەرگى بولىپ، بولاشاقتا ۇلكەن الەۋمەتتىك قاراما-قايشىلىقتارعا جول اشىپ بەرۋى ابدەن مۇمكىن. كورشى ەلدەردە سان الۋان شيەلەنىستەر بولىپ جاتقاندا، جاي وتىرا بەرۋگە بولمايدى. سەبەبى الاۋىزدىقتىڭ ءورتى كەز كەلگەن مەملەكەتكە جەتۋى مۇمكىن»، - دەپ اتاپ كورسەتتى ن. نازاربايەۆ.
وسى ورايدا پرەزيدەنت ازيا مەن افريكانىڭ كەدەي ەلدەرىندەگى ادام كاپيتالىن دامىتۋعا ارنالعان «جول كارتاسىن» ىسكە اسىرۋ قاجەتتىگىن جەتكىزدى. ال، ەڭ باستىسى، ەكونوميكانى ساياساتتان بارىنشا اجىراتىپ جۇرگىزگەن ءجون. «بۇگىن مەن نوبەل سىيلىعىنىڭ يەگەرلەرىمەن كەزدەستىم. سوندا مۇحاممەد يۋنۋس مىرزا ايتتى. قازىرگى بانكتەر باي مەملەكەتتەر ءۇشىن جۇمىس ىستەپ جاتىر. سوندىقتان كەدەيلەر ماسەلەسىنە كوڭىل ءبولىپ، شاعىن نەسيەلەر بەرۋ، اسىرەسە، ايەلدەرگە، سونداي-اق جاستاردى جۇمىسقا تۇرعىزۋ ماسەلەسى - ءبىز ءۇشىن ماڭىزدى ماسەلەلەردىڭ ءبىرى»، - دەدى ەلباسى.
اۆتور: ارمان اسقاروۆ
