قازىرگى جاعداي ءبىزدى قاتتى الاڭداتادى - ن. نازاربايەۆ
مەملەكەت باسشىسىنىڭ ايتۋىنشا، حالىقارالىق قاتىناستار «ۇستارانىڭ جۇزىمەن» جۇرگىزىلىپ كەلەدى.
«بۇل - قاۋىپتى ۇدەرىس. بىرىنشىدەن، قازاقستان جەتەكشى دەرجاۆالاردىڭ يادرولىق قاۋىپسىزدىك سالاسىنداعى ديالوگى توقتاپ قالادى دەپ الاڭدايدى.
سەبەبى ول يادرولىق قاۋىپ-قاتەرلەردى تومەندەتۋگە ارنالعان سوڭعى ونداعان جىلداردىڭ جۇمىسىن جوققا شىعارۋى ىقتيمال.
ەكىنشىدەن، ءبىزدى ەۋروپاداعى قاۋىپسىزدىك جانە ىنىتماقتاستىق ۇيىمىنىڭ ۋكراينا شيەلەنىسىن شەشە الماۋى قاتتى ويلاندىرادى. اتالعان ۇيىمنىڭ ارەكەتسىزدىگى ساياسي كۇش-جىگەردىڭ بولماۋىنان تۋىنداپ وتىر. 2010 - جىلى استانادا وتكەن ە ق ى ۇ سامميتىنەن كەيىن دە ونىڭ باسشىلىعى ءتيىستى وزگەرىستەردى ەنگىزە المادى.
ۇشىنشىدەن، بۇگىندە كەيبىر مەملەكەتتەر وتكەن عاسىردىڭ ەڭ جامان «مۇراسىن» قايتالاپ، شيەلەنىستەردى قارۋلى كۇشپەن شەشۋگە بارىپ جاتىر. قازاقستاننىڭ ودان كوڭىلى قالدى. تورتىنشىدەن، سان الۋان سانكتسيالار ەركىن ساۋداعا توسقاۋىل بولىپ جاتىر.
حالىقارالىق قارىم- قاتىناستار تاريحىنا ءۇڭىلىپ قاراساق، ونداي تاجىريبە ەشقاشان ءتيىمدى بولماعان. ول جاھاندىق ەكونوميكالىق دامۋعا قولبايلاۋ بولىپ وتىر»، - دەدى بۇگىن ن. نازاربايەۆ VII استانا ەكونوميكالىق فورۋمىنىڭ پلەنارلىق ماجىلىسىندە.
وسى ورايدا پرەزيدەنت «جاھاندىق سەنىمنىڭ» تازا ەكونوميكالىق كاتەگوريا ەكەنىن ەرەكشە اتاپ ءوتتى. «ول كاتەگوريا جوعارى بولعان سايىن الەمدىك ەكونوميكانى تەزدەتىپ قالپىنا كەلتىرۋگە بولادى»، - دەپ اتاپ كورسەتتى مەملەكەت باسشىسى.
اۆتور: ارمان اسقاروۆ
«الاش ايناسى»
