مەملەكەت باسشىسى نوبەل سىيلىعىنىڭ لاۋرەاتتارىمەن كەزدەستى
مەملەكەت باسشىسىمەن كەزدەسۋگە ۆيۋتريح كۋرت، فينن كيدلاند، دجوردج فيتتسدجەرالد سمۋت II، مۋحامماد يۋنۋس، سۆياتوسلاۆ تيماشيەۆ، پيسساريدەس كريستوفەر، ارە ۆارشەل قاتىستى.
نۇرسۇلتان نازاربايەۆ ءوز سۇحباتتاستارىنا VІІ استانا ەكونوميكالىق فورۋمىنا قوسقان ۇلەستەرى ءۇشىن العىس ايتىپ، بۇل شاراعا استانالىق نوبەل سىيلىعى لاۋرەاتتارى كلۋبىنىڭ قۇرىلۋى ەرەكشە ماڭىز بەرەتىنىن اتاپ ءوتتى.
«فورۋمعا سىزدەردىڭ قاتىسۋلارىڭىز ارقىلى بۇگىندە الەمدە از بولماي وتىرعان ەكونوميكالىق تۇيتكىلدەردىڭ سىندارلى شەشىمىنە ناقتى ۇلەس قوسىلادى. سەسسيالاردا ءسوز سويلەپ، ۇسىنىستار ازىرلەۋدىڭ جانە فورۋمنىڭ قورىتىندى قۇجاتتارىن دايىنداۋعا قاتىسۋدىڭ ماڭىزى زور»، - دەدى قازاقستان پرەزيدەنتى.
اڭگىمەلەسۋ بارىسىندا الەمدەگى ەكونوميكالىق، الەۋمەتتىك جانە ساياسي دامۋعا قاتىستى ءبىرقاتار پروبلەمالار، سونداي-اق جاھاندانۋ جاعدايىنداعى قازاقستاننىڭ دامۋ ماسەلەلەرى تالقىلاندى.
نۇرسۇلتان نازاربايەۆ الەمدىك قارجى-ەكونوميكالىق داعدارىس سالدارلارى بۇرىنعىسىنشا جاھاندىق ەكونوميكانى قاتتى قىسپاققا الىپ وتىرعانىن، ەۋروپاداعى ەكونوميكالىق پروبلەمالاردى شەشۋدەگى ءدۇدامالدىق، دامۋشى ەلدەردەگى ءوسىم قارقىنىنىڭ باياۋلاۋى سونىڭ ناتيجەسى ەكەنىن ايتتى.
سونداي-اق، مەملەكەت باسشىسى قازىرگى زامانداعى الەمدىك سىن-قاتەرلەر جاعدايىندا قازاقستان قولعا الىپ جاتقان شارالار تۋرالى اڭگىمەلەدى. اتاپ ايتقاندا، نۇرسۇلتان نازاربايەۆ ەلىمىز 2050-جىلعا دەيىنگى دامۋ ستراتەگياسىن، سونداي- اق ۇزاقمەرزىمدى ۇدەمەلى يندۋستريالىق-يننوۆاتسيالىق باعدارلاما قابىلداعانىن اتاپ ءوتتى.
بۇدان بولەك، نۇرسۇلتان نازاربايەۆ قازاقستاننىڭ الەمدىك، سونىڭ ىشىندە بالامالى ەنەرگەتيكاعا ەلەۋلى ۇلەس قوسىپ وتىرعانىن ايتتى. بۇعان استانادا «بولاشاقتىڭ ەنەرگياسى» تاقىرىبىمەن «ەكسپو-2017» كورمەسىن وتكىزۋ دە سەپتىگىن تيگىزەتىن بولادى.
ءوز كەزەگىندە نوبەل سىيلىعىنىڭ لاۋرەاتتارى قازاقستاننىڭ عىلىم مەن يننوۆاتسيانىڭ دامۋىنا قوسقان زور ۇلەسىن، سونداي- اق VІІ استانا ەكونوميكالىق فورۋمىنىڭ جاھاندىق الەۋمەتتىك-ەكونوميكالىق ماسەلەلەردى تالقىلاۋعا ارنالعان الەمدىك پلاتفورما بولىپ وتىرعانىن اتاپ ءوتتى.
