قازاقستان شەتەلدىك تالانتتى جاستارعا نازاربايەۆ ۋنيۆەرسيتەتىندە وقۋعا گرانتتار ۇسىنادى
بۇگىن استانادا ءوتىپ جاتقان VII استانا ەكونوميكالىق فورۋمى مەن II داعدارىسقا قارسى دۇنيەجۇزىلىك كونفەرەنتسيانىڭ جالپى وتىرىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى.
ءسوز اراسىندا مەملەكەت باسشىسى «كەدەيلىكتى جويۋ» جول كارتاسىنىڭ ازىرلەنەتىنىنە توقتالا كەلە، بۇنداعى باستى قۇرال رەتىندە ادامعا ينۆەستيتسيانى، ينفراقۇرىلىم مەن بيزنەستى دامىتۋدى اتاپ ءوتتى.
«قازاقستاندا بۇل باعىتتا ۇلكەن وڭ تاجىريبە قالىپتاستى. 2000 - جىلدىڭ باسىنداعى ەلىمىزدىڭ ەكونوميكالىق ءوسىم قارقىنى ۇدەي تۇسكەن شاقتا، ەل ازاماتتارىنىڭ داۋلەتتىلىگىن قالاي ترانسفورماتسيالايمىز دەگەن ماسەلەمەن بەتپە- بەت كەلدىك. ەكىنشى جاعىنان، ءبىز جۇرتشىلىقتى الەۋمەتتىك قولداۋدىڭ ايتارلىقتاي مۇمكىندىگىنە يە بولدىق. ءبىز ادامي كاپيتالعا ينۆەستيتسيانى تاڭدادىق، ارينە بۇنىڭ تيمدىلىگى تەز سەزىلمەگەنىمەن، ەل ومىرىندەگى ساپالى وزگەرىستەرگە قول جەتكىزدىك» ، - دەدى ەلباسى ن. نازاربايەۆ.
سونىمەن قاتار، مەملەكەت باسشىسى وسى باعىتتا «بولاشاق» باعدارلاماسى قولعا الىنعانىن، ونىڭ اياسىندا 10 مىڭداعان جاستار، ونىڭ ىشىندە از قامتىلعان وتباسىنىڭ تالانتتى بالالارى الەمنىڭ جەتەكشى وقۋ ورىندارىندا ءبىلىم العانىن العا تارتتى.
«ءبىز ءبىلىم بەرۋ مەن دەنساۋلىق ساقتاۋ جۇيەسىنە، الەۋمەتتىك ينفراقۇرىلىمدارعا ايتارلىقتاي ينۆەستيتسيا باعىتتاۋدامىز. قازاقستاندىقتاردىڭ ءومىر ءسۇرۋ جاسى سوڭعى 7 جىلدا 4,5 جىلعا ارتتى. ءبىز جۇرتشىلىقتىڭ كەدەيلىك دەڭگەيىن 13 ەسەگە دەيىن ازايتتىق. سونىمەن قاتار، ءبىز تابىستار بويىنشا حالىقتىڭ اراجىگى ايتارلىقتاي اجىراپ كەتۋىنە جول بەرمەدىك. سوندىقتان دا، بۇگىنگى كۇنى ءبىز وسى باعىتتاعى تاجىريبەنى وڭىردەگى مەملەكەتتەرمەن بولىسۋگە دايىنبىز. سونىڭ ىشىندە نازاربايەۆ ۋنيۆەرسيتەتىندە ورتالىق ازيا مەن باسقا دا ەلدەردىڭ تالانتتى جاستارىن وقىتۋعا گرانتتىق باعدارلامالار ۇسىنا الامىز» ، - دەدى ق ر پرەزيدەنتى.
اۆتور: قانات مامەتقازى ۇلى
