سانكتسيا سالۋ ساياساتى جاھاندىق اۋقىمداعى ەركىن ساۋدا قاعيداتىن جوققا شىعارادى - ن. نازاربايەۆ

  استانا. قازاقپارات - قازاقستان سانكتسيا سالۋ ساياساتىنىڭ جاھاندىق ەركىن ساۋدا جانە ەركىن رىنوك قاعيداتىنا قايشى كەلەتىنىن العا تارتادى.

 بۇگىن استانادا ءوتىپ جاتقان VII استانا ەكونوميكالىق فورۋمى مەن داعدارىسقا قارسى II دۇنيەجۇزىلىك كونفەرەنتسيانىڭ جالپى وتىرىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى.

«قازاقستان سانكتسيا سالۋ ساياساتىنىڭ جاھاندىق ەركىن ساۋدا جانە ەركىن رىنوك قاعيداتىنا قايشى كەلەتىنىن العا تارتادى. ەسكە سالا كەتەيىن، حالىقارالىق قاتىناستارداعى مۇنداي تاجىريبە تاريحتا ەشقاشان دا ناتيجەلى بولعان ەمەس. بۇنداي شارا ءسوزسىز جاھاندىق ەكونوميكالىق ءوسىمدى تەجەيدى، جاھاندىق ءادىل ەنەرگەتيكالىق جۇيەنى قالىپتاستىرۋعا كەدەرگى بولادى» ، - دەپ اتاپ ءوتتى ەلباسى ن. نازاربايەۆ.

 مەملەكەت باسشىسىنىڭ ايتۋىنشا، الەمدىك ساياساتتا سەنىمدىلىك دەڭگەيىنىڭ تومەندەۋى - اسا ءقاۋىپتى قۇبىلىس. «ويتكەنى، ХХІ عاسىرداعى سەنىم - بۇل وتە- موتە ەكونوميكالىق كاتەگوريا. سەنىم جوعارى بولعان سايىن، الەمدىك ەكونوميكانىڭ اۋقىمدى ءوسۋ مۇمكىندىگى دە زور بولا تۇسەدى» ، - دەپ تۇيىندەدى قازاقستان پرەزيدەنتى.

 اۆتور: قانات مامەتقازى ۇلى