ۇيىندە ۇكى باعىپ وتىر

  قىزىلوردا. قازاقپارات- جوسالى كەنتىنىڭ تۇرعىنى ساداقباي رايىمبايەۆ ۇيىندە ءبىر جىلدان بەرى ۇكى اسىراپ وتىر.

ساكەڭنىڭ بالالارى سىرتتا قوزى جايىپ ءجۇرىپ دالادا ۇكىنىڭ جاراقاتتانعان بالاپانىن كورىپ، ۇستاپ الىپ، ۇيگە اكەلەدى. قاناتى قاتپاعان بالاپان جاراقاتىنان ايىعىپ، بۇگىندە ەرەسەك ۇكىگە اينالعان.

اۋلاسىندا ۇكىدەن وزگە قويان، تاۋىقتارى دا بار بۇل ءۇيدى كورشىلەرى كىشى- گىرىم جانۋارلار باعى دەپ تە اتايدى.

بالاپان ۇكىنىڭ ۇيگە اكەلىنگەنىنە جىل تولىپتى. قاناتى قاتايىپ، جاراقاتىنان ابدەن ايىققان ۇكىگە تىشقان، تورعاي اۋلاپ بەرەتىن كورىنەدى. سونىمەن بىرگە ۇكى قوي مەن سيىردىڭ ەتىن دە تالعاماي جەيدى ەكەن. ۇكىنىڭ كۇندىز كوزى كورمەيتىن بولعاندىقتان ارناي قاراڭعى كەپەدە ۇستايدى.

«بۇل  ءتۇز تاعىسى قولعا ۇيرەنبەيدى. سول سەبەپتى الداعى ۋاقىتتا كيەلى قۇستى ءوزىنىڭ قۇت مەكەنى كەڭ دالاعا قايتا جىبەرەمىز» ، -  دەيدى ساداقباي اعانىڭ ۇلى راقىمجان.

اۆتور:  ەلۋباي اۋەزوۆ