مالايزيامەن بولعان كەلىسسوزدەردە ءۇش كەلىسىم شارتقا قول جەتكىزىلدى - ەلباسى

استانا. قازاقپارات - مالايزيا تاراپىمەن بولعان كەلىسسوزدەردىڭ ناتيجەسىندە ءۇش كەلىسىم شارتقا قول جەتكىزىلدى.

بۇل تۋرالى بۇگىن اقوردادا مالايزيا پرەمەر-ءمينيسترى نادجيب رازاكپەن بولعان كەلىسسوزدەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ءمالىم ەتتى.

«نادجيپ رازاك مىرزاعا مەنىڭ شاقىرۋىممەن رەسمي ساپارمەن كەلىپ، كەلىسسوزدەر جۇرگىزىپ، استانا ەكونوميكالىق فورۋمىنا قاتىسۋىنا ريزاشىلىعىمدى بىلدىرەمىن. ەكى ەلدىڭ اراسىنداعى قارىم-قاتىناس دامىپ كەلە جاتىر. ءبىز ءۇش جىلدىڭ ىشىندە ءۇش مارتە كەزدەستىك. ەكونوميكالىق قارىم-قاتىناس ارا قاشىقتىعىمىز الىس بولعاننان كەيىن كولىك، كوممۋنيكاتسيا ماسەلەلەرى قيىن بولعان سوڭ وتە ۇلكەن اۋقىمدا ەمەس، دەگەنمەن بىلتىرعى جىلعى ءوسىم 14 پايىز بولدى»، - دەپ توقتالدى پرەزيدەنت.

ەكى ەل اراسىندا كەلىسسوزدەر جاسالعانىنا توقتالعان ەلباسى بيزنەس قۇرىلىمدارىنىڭ اراسىندا ءۇش كەلىسىم شارتقا قول جەتكىزىلگەنىن، ولاردىڭ ەكەۋى ماڭعىستاۋ وبلىسىندا، بىرەۋى جامبىل وبلىسىندا ەكەنىن اتاپ ءوتتى. سوندا جالپى سوماسى 1 ميلليارد 100 ميلليوننان استام دوللاردىڭ كەلىسىم شارتىنا قول قويىلدى.

«بۇل كەزدەسۋدىڭ ارقاسىندا ەكى ەلدىڭ اراسىنداعى قارىم-قاتىناس بۇدان ءارى قاراي جاندانادى دەپ سەنەمىن»، - دەپ اتاپ ءوتتى ن. نازاربايەۆ.

 

اۆتور: رۋسلان عابباسوۆ