ۇلىلار تاققان ساعاتتار

استانا. قازاقپارات - ەلىمىزدىڭ مەملەكەتتىك ورتالىق مۇراجايىندا بۇرىن بولماعان ەرەكشە كورمە ۇيىمداستىرىلدى.

وعان وتكەن عاسىردىڭ 20 - جىلدارىنان بەرى قوردا ساقتاۋلى تۇرعان ساعاتتىڭ الۋان ءتۇرى قويىلدى.

ساعات ءتىلى بەلگىلى ءبىر ۋاقىتتى ءبىلدىرىپ قانا قويماي، وتكەن داۋىردەن سىر شەرتەتىنىن كورمەدەن اڭعارۋعا بولادى.

مۇندا قويىلعان ءاربىر جادىگەردىڭ ءوز تاريحى بار.

ءاليا راحمانقۇلوۆا، قورلاردى ساقتاۋ جونىندەگى توپ جەتەكشىسى:

- ءبىزدىڭ قورىمىزدا 1814 - جىلى ناپولەون سارايىنان الىنعان ۇستەل ساعاتى بار. ونى پاريجگە باسىپ كىرگەن ورىس سولداتتارىنىڭ ءبىرى پودپولكوۆنيك ەۆدوكيموۆكە 100 سومعا ساتىپتى. ءبىزدىڭ مۇراجايدا بۇل جادىگەر 1924 - جىلدان بەرى ساقتاۋلى.

كورمەگە 3,5 مىڭ جىل بۇرىن پايدا بولعان كۇن ساعاتىنىڭ كوشىرمەسىنەن باستاپ، مەحانيكالىق ساعاتتارعا دەيىنگى ۋاقىتتى ولشەۋ قۇرالىنىڭ 80 نەن استام ۇلگىسى قويىلدى.

الايدا كوپشىلىك نازارى ورتادا تۇرعان توپتامادا بولدى. مۇندا ىبىراي التىنسارين، ساكەن سەيفۋللين، باۋىرجان مومىش ۇلى، قانىش ساتبايەۆ سىندى قازاق ارداقتىلارىنىڭ ساعاتتارى قويىلعان.

سونىمەن قاتار قازاق حالقىنىڭ كاسىبي ءان ونەرىنىڭ بەلدى وكىلى جاياۋ مۇسانىڭ ساعاتى دا وسى كورمەگە قويىلعان. سىرى كەتسە دە، سىنى كەتپەگەن ساعاتتاردىڭ ءتىلى توقتاعانىمەن، 1 ايعا جالعاساتىن مادەني شارا ارقاسىندا بۇل جادىگەرلەردىڭ عۇمىرى ۇزاراتىنى ايدان انىق.

 

24.kz