قازاقستاندا مەملەكەتتىك ەمتيحان باستالاردا «شپور» ساۋداسى قىزدى
شىمكەنتتىك ارسەن (ەسىمىن تولىق جاريالاماۋدى ءوتىندى - رەد.) - ۇ ب ت تاپسىرۋعا دايىندالىپ جۇرگەن جوعارى سىنىپ وقۋشىسى.
ول قازىر تەستەن جوعارى بالل الۋدىڭ بار جولىن قاراستىرىپ جاتقانىن ايتادى.
تالاپكەر سىناقتان ءوتۋ ءۇشىن ۇ ب ت سۇراقتارىنىڭ «شپورىن» («شپارگالكا» ءسوزىنىڭ اۋىزەكى ايتىلۋى - رەد.) ساتىپ الۋعا دا دايىن. «جىل بويى دايىندالدىم. ءبىراق بار سۇراقتى جاتتاۋ مۇمكىن ەمەس عوي. سوندىقتان قازىر «شپور» ساتىپ الۋعا دايىندالىپ، تەست كەزىندە سونى قولدانۋ جولىن ويلاستىرىپ ءجۇرمىن. تەستىڭ ءوز جاۋابى بولسا دا، ساتىپ الامىن»، - دەيدى ول.
ارسەن سياقتى مەكتەپ بىتىرۋشىلەردىڭ مەملەكەتتىك قۇپياعا جاتقىزىلعان ۇ ب ت-نىڭ جاۋاپتارىن ساتىپ الۋ سياقتى زاڭسىز ارەكەتكە بارۋىنا تەستىڭ مازمۇنىنداعى قاراما-قايشىلىقتار مەن ۇيىمداستىرۋ ماسەلەلەرى عانا اسەر ەتپەسە كەرەك.
سوڭعى ايلاردا الەۋمەتتىك جەلىلەردە «ۇ ب ت شپورلارىن» ساتاتىن توپتار مەن پاراقشالاردىڭ دا كوبەيىپ كەتۋى بۇل قۇبىلىستى وقۋشىلار ءۇشىن كانىگى جايتقا اينالدىرعانداي. «شپور» ساۋداگەرلەرى ءوز پاراقشالارىندا تاۋارلارىن: «ءار پاننەن 25 بالل. مامىردىڭ 25 ىنە دەيىن ساتىپ الىڭىزدار. «شپور» سانى شەكتەۋلى» دەپ جارنامالاپ جاتىر. قايدان الۋعا بولاتىنى، كىمگە حابارلاسۋ كەرەكتىگى پاراقشالاردا اشىق جازىلعان.
ساتىلاتىن «شپورلار» شاعىن ەتىپ دايىندالعان. ءار ءپان سىناعىنىڭ «دايىن جاۋابىندا» سۇراقتار مەن جاۋاپتار الفاۆيتتىك رەتپەن ورنالاسىپتى. ۇبت سۇراقتارىنىڭ دۇرىس جاۋاپتارى بار شاعىن «شپور-كىتاپشالار» 2014 - جىلدىڭ اقپان ايىنان باستاپ «قارا بازارعا» شىعا باستاعان. الماتىلىق باقىت (ەسىمى ءوز ءوتىنىشى بويىنشا وزگەرتىلدى - رەد.) ازاتتىققا ۇ ب ت «شپورلارىن» ساتىپ جۇرگەنىنە 2 جىل بولعانىن ايتتى.
ول بۇل «بيزنەسىنەن» قانشا پايدا تاباتىنىن ناقتى ايتپادى، ءبىراق «پايدا تۇسپەسە، اينالىسپايمىن عوي» دەپ جاۋاپ بەردى. «بارلىق ءپاننىڭ جاۋاپتارى بار. الاقانعا سياتىنداي كولەمدە جاسالعان. جاۋاپتار الفاۆيت بويىنشا تۇر. ءبىر ءپاننىڭ شپورى قازىر 3-4 مىڭ تەڭگە. ۇ ب ت جاقىنداعاندا قىمباتتاۋى مۇمكىن»، - دەدى ول. ماقسات دەگەن شپور ساتۋشى جىگىت تەحنيكالىق پاندەردىڭ شپورى 4 مىڭ، گۋمانيتارلىق پاندەردىڭ شپورى 3 مىڭ تەڭگە تۇراتىنىن ايتتى. ماقسات ءوز تاۋارلارىن «ءبىر ءپاننىڭ شپورىندا 10 مىڭنان استام سۇراقتىڭ جاۋابى بار. شپوردىڭ كولەمى، وتە شاعىن - 5х7 سانتيمەتر»، - دەپ سيپاتتاپ بەردى.
پاۆلودار قالاسىندا ۇ ب ت-عا ارنالعان «شپورلاردىڭ» باعاسى الماتىعا قاراعاندا ارزان. شاعىن كىتاپشالار ساۋدالاپ جۇرگەن سامات ەسىمدى جىگىت بەس ءپاننىڭ شپورى 4500 تەڭگە تۇراتىنىن ايتادى.
ونىڭ ايتۋىنشا، «شپوردىڭ» ىشىندە «بۇكىل سۇراقتاردىڭ جاۋابى بار» جانە «2014 - جىلعى تەست تاپسىرمالارى» دا ەنگىزىلگەن. وسكەمەندە «شپور» ساۋدالايتىن ءادىل ءبىر ءپاننىڭ كىتاپشاسى 2500 تەڭگە تۇراتىنىن ايتتى.
ول «ءار ءپاننىڭ شپورىندا 17 مىڭ سۇراقتىڭ جاۋابىنا دەيىن بار»، - دەيدى. تالاپكەرلەر الدانىپ قالماسا ەكەن كەزىندە «شپور» ساتىپ الىپ وپىق جەگەندەر دە بار. وسكەمەندىك بالنۇر كارمەنوۆا بىلتىر 8 مىڭ تەڭگەگە «شپور الىپ، تەست كەزىندە پايدالانا الماعانىن ايتادى. «ساتىپ العاننان پايدا جوق. كوميسسيا قوزعالتپايدى. ۇستالساڭ، اكت تولتىرىپ شىعارىپ جىبەرۋى مۇمكىن. مەن ماتەماتيكا، فيزيكا، قازاقستان تاريحىنان «شپور» العانمىن. پايدالانا المادىم. ءوز كۇشىممەن 84 بالل الىپ، فيزيكا مۇعالىمى ماماندىعىنا گرانتقا ءىلىنىپ كەتتىم. سوندىقتان تالاپكەرلەر الدانىپ قالماسا ەكەن»، - دەيدى سۇحباتتاسىمىز. قازاقستان ۇلتتىق تەستىلەۋ ورتالىعىنىڭ ماماندارى ازاتتىققا بەرگەن سۇحباتىندا «شپور ساتۋشى» جانە «شپور قولدانۋشى» ۇستالعان جاعدايدا قانداي جازا قولدانىلاتىنىن ايتىپ بەردى. «ەگەر تالاپكەر تەلەفون، «شپارگالكامەن» ۇستالسا، بىردەن اۋديتوريادان شىعارىلادى جانە ناتيجەسى ەسەپكە الىنبايدى. ال «جاۋاپ» جانە «شپور» ساتىپ جۇرگەندەر بولسا، بىردەن ۇ ق ك جانە قۇقىق قورعاۋ ورگاندارى ارقىلى تۇتقىندالىپ، قىلمىستىق ءىس قوزعالادى»، - دەپ جازىلعان تەستىلەۋ ورتالىعىنىڭ رەسمي جاۋابىندا. ق ر-دا ۇ ب ت ۇيىمداستىرۋ جانە وتكىزۋ ەرەجەسى بويىنشا تەست جاۋاپتارى مەملەكەتتىك قۇپيا بولىپ ەسەپتەلەدى.
ال مەملەكەتتىك قۇپيانى اشقان ادام قىلمىستىق كودەكستىڭ 172-بابى بويىنشا 5-جىلعا دەيىن باس بوستاندىعىنان ايىرىلادى. ق ر ءبىلىم جانە عىلىم ءمينيسترى اسلان ءسارىنجىپوۆتىڭ جەكە بلوگىنا دا اتا-انالار «ۇبت جاۋابىن ساتۋ» ، «تەستىلەۋدىڭ تازا وتپەيتىنى» سياقتى ماسەلەلەردى كوتەرگەن كوپتەگەن حاتتار ءتۇسىپ جاتادى.
مينيستر سول شاعىمداردىڭ بىرىنە «بوتەن ادامداردىڭ تەستىلەۋدى وتكىزۋگە كەدەرگى كەلتىرمەس ءۇشىن ءار اۋديتورياعا ءبىر مينيسترلىك وكىلى بولادى جانە بەينەباقىلاۋ مەن ۇيالى بايلانىستاردى بۇعاتتايتىن اپپاراتتار ورناتىلادى»، - دەپ جاۋاپ بەرگەن. قازاقستان ۇلتتىق تەستىلەۋ ورتالىعىنىڭ مالىمەتى بويىنشا، 2014 - جىلى 2-9 ماۋسىم ارالىعىندا وتەتىن ۇ ب ت- عا قاتىسۋعا 92077 تۇلەك ءوتىنىش بىلدىرگەن. ونىڭ 63603 ى قازاق تىلىندە، 28474 ى ورىس تىلىندە تاپسىرادى.
ۇ ب ت - تاپسىرۋ مەكتەپ بىتىرە سالىپ قازاقستانداعى جوعارى وقۋ تۇسكىسى كەلەتىن وقۋشىلار ءۇشىن مىندەتتى سىناق.
اقپارات كوزى: ازاتتىق
