مۇيىزدەن مىڭداپ پايدا تاپقان قىتايداعى قانداسىمىز - فوتو
بولاتبەك وتكەن جىلى كۇزدەن باستاپ، 145 مىڭ يۋاننىڭ (23 مىڭ ا ق ش دوللارى كولەمىندە) تاپسىرىسىن الىپ، مۇيىزدەن رومكە جانە تاراق، وزگە دە بۇيىمداردى جاساۋدى قولعا العان. قازىر ولاردىڭ تەڭ جارتىسىن بولىپ، قالعانىن بيىل قىركۇيەك ايىنا دەيىن ءبىتىرۋدى جوسپارلاپ وتىر.
شەبەر قولونەرگە كەرەك ءمۇيىزدى ءۇرىمجى قالاسىنداعى مال سويىسحانالارىنان ءار كەلىسىن 25 يۋاننان بولشەك باعامەن ساتىپ الادى. مۇيىزدەردى نەشە رەت قايناتىپ، ىشكى وزەگىن الىپ، كۇلىمسى يىسىنەن ارىلتادى. جانە ارنايى سۇيىقتىقتارمەن تازالاپ جۋىپ، ەڭ سوڭىندا اسپاپپەن سىرتىن ىسىپ مايدالاپ، ەشقانداي بوياۋ ىستەتپەي ءمۇيىزدىڭ تابيعي رەڭى بويىنشا وڭدەپ شىعارادى.
بۇل ءارى كوركەم ءارى زالالسىز تۇتىنۋ بۇيىمىنا اينالىپ، كورگەن ادامدى وزىنە تارتادى. شەبەر ءمۇيىزدى وڭدەۋ جاپالى بولعانمەن تۇسەر پايدانىڭ مول ەكەنىن ايتادى. شامامەن 110 مىڭ يۋان (17 مىڭ ا ق ش دوللارى) تازا پايدا قالادى دەپ وتىر.
بولاتبەك وتكەن قىستا قايىڭ مەن سامىرسىننىڭ توشىنىنان قازاقى ويۋلاپ شۇبات، قىمىز، ايران قۇياتىن ىدىستان 10 كەسەسىمەن 30 پارىن جاساپ ساتىپ، 10 مىڭ يۋاننان استام پايدا تاۋىپتى. ونەرلى جىگىتىمىز جاقىندا اۋىلدا وتكەن قولونەر باسەكەسىندە 1-ورىنعا يە بولىپ، قارجىلاي سىيلىق العان.
بولاتبەكتىڭ تاپقىر دا شەبەرلىگى، 4 جىلدان بەرى سال اۋرۋ اكەسىن الاقانىنا سالىپ وتىرعان مەيىرباندىعى، وپالىلىعى جۇرتتى ريزا ەتۋدە. ازاماتتار، سوڭىندا اباي اتامىزدىڭ مىنا دانالىعى ءاردايىم ەسىمىزدە جۇرسە ەكەن دەيمىن: «ادام بالاسى ادام بالاسىنان اقىل، عىلىم، ار، مىنەز دەگەن نارسەلەرمەن وزادى»
ايتپاقشى، بولاتبەك الەمدەگى ەڭ كىشكەنە دومبىرا جاساپ، گيننەستىڭ رەكوردتار كىتابىنا كىرگەنىن راستايتىن №01-1201-09541 كۋالىگىن العان ازامات. اتالعان دومبىرا قىزىل اعاشتان قيۋلاستىرىپ جاسالعان. ول كۇي اسپابىنا ءتان بارلىق شارتتارعا ساي. ينەمەن ءىلىپ شەرتۋگە عانا بولاتىن «رەكورد يەسىنىڭ» ۇلكەندىگى ادامنىڭ شىناشاعىنا دا جەتپەيدى. ياعني، ۇزىندىعى - 4،5 س م، ەنى - 1،4 س م، بيىكتىگى - 1،2 س م عانا.
تۇرسىنجان جاناتاي ۇلى
كەلۋ قاينارى: قىتاي حالىق گازەتىنىڭ تورابى
