مارستاعى جۇمباق نىسان: NASA سۋرەتى جاڭا بولجامدارعا جول اشتى

MSN مالىمەتىنشە، سۋرەتتى NASA- نىڭ Curiosity روۆەرى 2024-جىلى تۇسىرگەن. كادردان جارتاستى توبە، الىستاعى تاۋلار جانە مارس كوكجيەگىنىڭ ۇستىندە قالقىپ تۇرعانداي كورىنەتىن جۇمباق قارا نىساندى بايقاۋعا بولادى.

Curiosity روۆەرى مارستىڭ ءبىر كەزدەرى ميكروبتىق تىرشىلىككە قولايلى بولعان-بولماعانىن زەرتتەپ كەلە جاتقانىنا 14 جىل بولدى.

الايدا ءدال وسى اسپانداعى تۇسىنىكسىز نىسان جۇرتتىڭ نازارىن اۋداردى. X الەۋمەتتىك جەلىسىنىڭ قولدانۋشىسى كاري سيۆەرتسەن سۋرەتتى سارسەنبى كۇنى قايتا جاريالاعاننان كەيىن، ول قىزۋ تالقىعا ءتۇستى.

جازبا كوپ ۇزاماي نىسان قىزىل عالامشارداعى بوتەن وركەنيەتتىڭ بەلگىسى بولۋى مۇمكىن دەگەن ءتۇرلى بولجامدارعا سەبەپ بولدى.

2024-جىلى Curiosity روۆەرى تۇسىرگەن فوتوسۋرەتتە جارتاستى توبە، الىستاعى تاۋ شىڭدارى جانە مارس كوكجيەگىنىڭ ۇستىندە قالقىپ تۇرعانداي كورىنەتىن جۇمباق قارا نىسان بەينەلەنگەن.

دەگەنمەن ءبىر عانا سۋرەت بۇل نىساننىڭ ۇشاتىن اپپارات نەمەسە ءتىپتى ناقتى فيزيكالىق وبەكت بولعانىن دالەلدەمەيدى.

ونىڭ NASA- نىڭ Ingenuity تىكۇشاعى بولۋى دا مۇمكىن ەمەس. سەبەبى ول كەزدە Ingenuity Curiosity جۇرگەن جەردەن شامامەن 2300 ميل (3700 شاقىرىمداي) قاشىقتاعى دجەزەرو كراتەرىندە بولعان.

عالىمدار مەن ماماندار بۇل كورىنىسكە الدەقايدا قاراپايىم تۇسىنىكتەمەلەر بار ەكەنىن ايتادى. مىسالى، نىسان اۋاداعى شاڭ، كامەرانىڭ اقاۋىنان پايدا بولعان ارتەفاكت نەمەسە عارىشتىق ساۋلەنىڭ روۆەر كامەراسىنىڭ سەنسورىنا اسەر ەتۋىنەن پايدا بولعان بەلگى بولۋى مۇمكىن.

سۋرەت قاي جەردە تۇسىرىلگەن؟

فوتوسۋرەت Curiosity روۆەرى مارستاعى گەيل كراتەرىندە، شارپ تاۋىنىڭ تومەنگى بوكتەرىندە جۇرگەن كەزدە تۇسىرىلگەن.

روۆەر ەجەلگى ارناعا ۇقساس گەديز ۆالليس جوتاسىنىڭ ماڭىنداعى تاستى جەرمەن ءجۇرىپ وتكەن. عالىمداردىڭ پايىمىنشا، بۇل جەر بۇرىن سۋ اعىنىنىڭ، كوشكىندەردىڭ نەمەسە وسى ەكى پروتسەستىڭ اسەرىنەن قالىپتاسقان بولۋى مۇمكىن.

Curiosity سۋرەت تۇسىرىلگەن 2024-جىلعى 10-ساۋىردە جوتاعا قاراي وڭتۇستىك-باتىس باعىتتا قوزعالىپ بارا جاتقان.

X جەلىسىندەگى قولدانۋشىلاردىڭ ءبىرى بۇل نىسان كامەرا ارتەفاكتىسى بولۋى مۇمكىن ەكەنىن ايتىپ، «بوتەن عالامشارلىقتار نەمەسە ءوزىمىز» دەگەن بولجام جاساعان.

مارستاعى تاعى ءبىر جۇمباق نىسان

وسى ايدا Curiosity تۇسىرگەن باسقا ءبىر سۋرەت تە جۇرتتىڭ نازارىن اۋداردى. وندا الىستان تۇسىنىكسىز نىسان كورىنەدى. كەيبىر ادامدار ونى مەدۋزاعا ۇقسايتىن تىرشىلىك يەسى نەمەسە قانداي دا ءبىر مەحانيكالىق قۇرىلعى بولۋى مۇمكىن دەپ بولجادى.

NASA- نىڭ Curiosity روۆەرى بۇل سۋرەتتى 2023-جىلعى 20-تامىزدا، ا ق ش شىعىس ۋاقىتىمەن شامامەن كەشكى 18:27 دە تۇسىرگەن.

كادردا شاڭ باسقان مارس بەتى، جارتاستى توبەلەر مەن بيىك تاۋلار كورىنەدى. الايدا پانورامانىڭ سول جاق بۇرىشىنان ەكى جىڭىشكە اياقتىڭ ۇستىندە تۇرعانداي كورىنەتىن ۇلكەن قارا دەنەلى كىشكەنتاي فيگۋرا بايقالعان.

بۇل سۋرەت تە Curiosity روۆەرى مارستا قوزعالىپ جۇرگەن بەلگىسىز نىساندى ءتۇسىردى دەگەن بولجامعا سەبەپ بولدى.

NASA - نىڭ Curiosity روۆەرى 2023-جىلى الىستان تۇرعان جۇمباق نىساندى ءتۇسىرىپ العان.

الايدا ءدال سول اۋماقتى ءبىر مينۋتقا جەتپەيتىن ۋاقىت بۇرىن تۇسىرىلگەن سۋرەتتەردە بۇل جۇمباق فيگۋرا كورىنبەگەن.

سونىمەن قاتار نىسان بەينەلەنگەن سۋرەت سول كۇنى NASA سايتىندا جاريالانعان Curiosity تۇسىرىلىمدەرىنىڭ سوڭعى كادرى بولعان. روۆەردىڭ كەلەسى سۋرەتى شامامەن ەكى ساعاتتان كەيىن تۇسىرىلگەن جانە كامەرا باسقا باعىتقا بۇرىلعان.

NASA كەيىن بۇل نىساننىڭ قوزعالعان-قوزعالماعانىن، روۆەرگە جاقىنداعانىن نەمەسە ونىڭ كامەراداعى اقاۋدان پايدا بولعان «ارتەفاكت» ەكەنىن كورسەتەتىن باسقا سۋرەتتەردى جاريالاعان جوق.

NASA مارستان تىرشىلىك تاپتى ما؟

2025-جىلعى قىركۇيەكتە NASA Perseverance روۆەرى جيناعان مارس ۇلگىسىنەن ەجەلگى ميكروبتىق تىرشىلىكتىڭ بولعانىن كورسەتۋى مۇمكىن ەڭ ايقىن بەلگىلەر تابىلعانىن مالىمدەگەن.

الايدا عارىش اگەنتتىگى دە، ا ق ش بيلىگى دە مارستا اقىلدى تىرشىلىك يەلەرىنىڭ بولعانىنا قاتىستى ەشقانداي دالەل تابىلماعانىن ايتىپ كەلەدى.

سۋرەتتى قايتا جاريالاعان كاري سيۆەرتسەن:

كەيدە كوزىمە ەرەكشە نارسەلەر تۇسسە، سولاردى وسىندا بولىسەمىن. مەن باسقا عالامشارلاردا تىرشىلىك بار ەكەنىنە سەنەمىن. NASA مارستا تىرشىلىكتىڭ ىقتيمال ىزدەرىن تاپقانىن ەسكەرسەك، ىزدەۋدى ءدال وسى جەردەن جالعاستىرۋعا بولادى، - دەپ جازعان.

ونىڭ جازباسىنا پىكىر بىلدىرگەندەردىڭ ءبىرى:

مارستاعى ەڭ ۇزدىك نلو سۋرەتتەرىنىڭ ءبىرى! - دەگەن.

ال مارستى زەرتتەۋشى جان ۋورد X جەلىسىندە بۇل نىساندى «مارستا بايقالعان مەدۋزا ءپىشىندى UFO/UAP» دەپ اتاعان. ونىڭ پىكىرىنشە، نىسان مارس بەتىندەگى ءبىر نارسەمەن بايلانىسىپ تۇرعانداي كورىنەدى. زەرتتەۋشى ونىڭ ءۇش اياقتى قۇرىلعىعا ۇقسايتىنىن دا ايتقان.

كەيبىر قولدانۋشىلار جۇمباق نىساندى «الەمدەر سوعىسى» عىلىمي-فانتاستيكالىق فيلمىندەگى الىپ ءۇش اياقتى بوتەنعالامشارلىق ماشينالارمەن سالىستىرعان.

دەگەنمەن سكەپتيكتەردىڭ پىكىرىنشە، الىستان كورىنگەن كىشكەنتاي قارا فيگۋرانىڭ بوتەن تىرشىلىككە ەش قاتىسى جوق. ولار مۇنى Curiosity كامەراسىندا پايدا بولعان بۇلىنگەن پيكسەلدەر نەمەسە تەحنيكالىق ارتەفاكت بولۋى مۇمكىن دەپ سانايدى.

el.kz