«ارسەلورميتتال تەمىرتاۋدىڭ» ورنىنا كەلەتىن مەنشىك يەلەرىنە قانداي شارت قويىلادى

قاراعاندى وبلىسىنىڭ اكىمى ەرماعانبەت بولەكپايەۆ «ارسەلورميتتال تەمىرتاۋ» كومپانياسىنىڭ ورنىنا كەلەتىن جاڭا مەنشىك يەلەرىنە قويىلاتىن نەگىزگى تالاپتار تۋرالى ايتتى، دەپ حابارلايدى Kazinform اگەنتتىگى.

«قازىر ۇكىمەت پەن مەملەكەت قويىپ وتىرعان العاشقى شارتتار - ارينە، كومىر جانە بولات دەپارتامەنتتەرىنىڭ وندىرىسىنە ينۆەستيتسيا سالۋ. بۇل - ورىندالۋى كەرەك ءبىرىنشى شارت. سونداي- اق نەگىزگى قورلاردى جاڭارتۋ كەرەك. ونىڭ ىشىندە، ەڭ الدىمەن، ارينە، قاۋىپسىزدىك كۇشەيتىلۋى قاجەت. جاڭا مەنشىك يەسىنىڭ الدىنا وسىنداي شارتتار قويىلادى»، - دەدى قاراعاندى وبلىسىنىڭ اكىمى.

ازىرگە كومىر دەپارتامەنتى باسشىسىنىڭ مىندەتىن اتقارۋشى بولىپ ۆاديم باسين تاعايىندالدى. ول قاراعاندى وبلىسى اكىمىنىڭ ورىنباسارى قىزمەتىنەن بوساتىلدى. بۇل تۋرالى ايماق باسشىسىنىڭ ءوزى ايتتى.

«ءيا، ۆاديم باسين وبلىس اكىمدىگىندەگى قىزمەتىنەن كەتتى»، - دەپ راستادى ەرماعانبەت بولەكپايەۆ.

ەسكە سالايىق، بۇگىن تۇندە قاراعاندى وبلىسىنداعى كوستەنكو اتىنداعى شاحتادا ءورت بولدى. ساعات 17.33 تەگى مالىمەت بويىنشا 33 كەنشىنىڭ دەنەسى تابىلدى,13 ادام ىزدەستىرىلىپ جاتىر. 20 شاحتەر اۋرۋحاناعا جەتكىزىلدى.

كەشقۇرىم بريفينگ وتكىزگەن توتەنشە جاعدايلار ءمينيسترى سىرىم ءشارىپحانوۆ جەر استىندا قالعان كەنشىلەردى ءتىرى تابۋعا ءۇمىت وتە از ەكەنىن ءمالىم ەتتى.

كاسىبي اسكەريلەندىرىلگەن اپاتتىق- قۇتقارۋ قىزمەتتەرىنىڭ رەسپۋبليكالىق ورتالىق شتابى قاراعاندى فيليالى ديرەكتورىنىڭ ورىنباسارى جۇمات وكەنوۆ مەرت بولعان كەنشىلەردىڭ جەكە باسىن انىقتاۋ قيىنعا ءتۇسىپ جاتقانىن ايتتى.