ارقانىڭ قۇتى: باياناۋىلدىڭ قار باسقان تاۋلارىندا ارقار كوزگە ءتۇستى
پاۆلودار. KAZINFORM - باياناۋىل ۇلتتىق پاركىنىڭ دەرەگىنشە، بۇگىندە بۇل اۋماقتا شامامەن شامامەن 800 گە جۋىق ارقار بار. ولار ۇنەمى تاۋلى ايماقتاردا تىرشىلىك ەتىپ، تاۋ شىڭدارىندا جايىلادى.
جەرگىلىكتى تابيعات جاناشىرى، بلوگەر امان قانات ءوز Instagram پاراقشاسىندا /@Tabigatym/ باياناۋىل تاۋلارىنان درونمەن تۇسىرىلگەن اسەرلى كادرلاردى جاريالادى. ۆيدەودا تاۋ شىڭدارىندا ەمىن-ەركىن جوسىپ جۇرگەن ءبىر توپ ارقار بەينەلەنگەن.
- باياناۋىل مەملەكەتتىك ۇلتتىق تابيعي پاركى! ارقار - تابيعاتتىڭ كوركى! - دەپ جازدى تابيعات جاناشىرى.
ارقار — ەلىمىزدىڭ « قىزىل كىتابىنا» ەنگەن جابايى جانۋار. ەرتىس-بايان وڭىرىندە جابايى جانۋارلار سانىنىڭ ارتا ءتۇسۋى كوڭىل قۋانتادى. ادەتتە ارقارلار ادامداردان الىس، بيىك تاۋلاردىڭ قويناۋىندا جۇرەدى جانە كامەرا وبەكتيۆىنە سيرەك تۇسەدى.
باياناۋىل ۇلتتىق پاركى ماماندارىنىڭ ايتۋىنشا، بۇل اۋماقتا شامامەن 800 گە جۋىق ارقار بار. ولار نەگىزىنەن اقبەتتاۋ، قىزىلتاۋ، جەلتاۋ، دالباتاۋ، قالماققىرعان تاۋلارىن مەكەندەيدى.
بۇعان دەيىن باياناۋىلدا جول جاعالاي جۇگىرگەن ارقار كادرعا تۇسىپ قالدى. جانۋاردىڭ جول جاعالاي جۇگىرىپ، ەرەكشە مىنەز-قۇلىق تانىتقانى جەلى قولدانۋشىلارىنىڭ قىزۋ تالقىسىنا تۇسكەن ەدى.
