ارقادا تۋىپ، ات باسىن التايعا تىرەگەن قوجابەرگەن باتىر تۋرالى تاريحي رومان تانىستىرىلدى

جاڭا شىعارما «فوليانت» باسپاسىنان جارىق كورگەن. روماندا قازاق حالقىنىڭ XVIII عاسىرداعى الماعايىپ كەزەڭى، ەل مەن جەردى قورعاۋ جولىنداعى كۇرەسى، اتا قونىسقا ورالۋ ارمانى جانە سول داۋىردەگى تاريحي تۇلعالاردىڭ تاعدىرى كوركەم باياندالادى.

اۆتوردىڭ ايتۋىنشا، شىعارما قوجابەرگەن باتىردىڭ ءومىر جولى ارقىلى سول كەزەڭدەگى قازاق حالقىنىڭ باسىنان وتكەن تاريحي وقيعالاردى سۋرەتتەيدى.

- قوجابەرگەن باتىر - ارقادا تۋىپ، ات باسىن التايعا تىرەگەن، بۇكىل ءومىرىن ەل شەتىندە، جاۋ وتىندە وتكىزگەن تاريحي تۇلعا. ول قازاق جەرىن جوڭعار شاپقىنشىلىعىنان قورعاۋعا جانە قازىرگى قازاق شەكاراسىنىڭ قالىپتاسۋىنا زور ۇلەس قوسقان. باتىر تۋرالى دەرەكتەر كوپ، ولاردىڭ ءبىرقاتارى قىتاي دەرەككوزدەرىندە دە ساقتالعان. روماندا قازاق قوعامىنىڭ تىنىس- تىرشىلىگى، ءداستۇرى مەن مادەنيەتى، حاندار مەن بيلەر كەڭەسىنىڭ شەشىمدەرى جانە سول داۋىردەگى قوعامدىق ورتا كەڭىنەن قامتىلادى. سونداي-اق جوڭعار شاپقىنشىلىعىنا قارسى كۇرەس كەزىندەگى ەلدىڭ جاعدايى، باتىرلاردىڭ جاۋعا قارسى تىزە قوسىپ، ەلدىك جولىندا بىرىگۋى، قان كەشكەن شايقاستارى مەن كۇن- ءتۇن دەمەي ات ۇستىندە ءجۇرىپ، ۇزاق جولداردى باسقان جورتۋىلدارى سۋرەتتەلەدى. قوجابەرگەن باتىردىڭ التاي مەن تارباعاتايعا كوش باستاپ، سول وڭىرلەرگە ەل قونىستاندىرعان ەرلىگى دە باياندالادى، - دەيدى جازۋشى.

تۇرسىنحان زاكەننىڭ ايتۋىنشا، «قارابەرەن» - ءبىر عانا باتىردىڭ تاعدىرىن باياندايتىن شىعارما ەمەس، XVIII عاسىرداعى قازاق حالقىنىڭ بولمىسى مەن ارمان- مۇراتىنا قايتا ۇڭىلۋگە مۇمكىندىك بەرەتىن تاريحي-كوركەم تۋىندى.

- بۇل تۋىندى - مەنىڭ قوجابەرگەن باتىردىڭ ەرلىك جولى ارقىلى تۇتاس XVIII عاسىرعا قويعان ەسكەرتكىشىم. ول سول ءبىر الماعايىپ زاماندا ەل باستاعان، قول باستاعان ەرلەردىڭ جانە قازاق دالاسىنىڭ ءار توبەسىندە، ءار قونىسىندا قورىم تاسى قالعان بوزداقتاردىڭ رۋحىنا ارنالادى،-دەيدى جازۋشى.

تۇساۋكەسەر بارىسىندا جاڭا تۋىندى تۋرالى پىكىرلەر ايتىلىپ، روماننىڭ جازىلۋ تاريحى مەن تاريحي نەگىزى تانىستىرىلدى.