ارگەنتينالىقتار حاۆەر ميلەيدىڭ رەفورمالارىنا قارسى نارازىلىق اكسياسىنا شىقتى
استانا. KAZINFORM - ون مىڭداعان ارگەنتينالىق ازامات ەل پرەزيدەنتى حاۆەر ميلەيدىڭ رەفورمالارىنا قارسى نارازىلىق اكتسياسىنا شىقتى، دەپ حابارلايدى
ەلدەگى ەڭ ءىرى كاسىپوداق ۇيىمى CGT 24 قاڭتارعا جالپىۇلتتىق ەرەۋىل جاريالادى. بۋەنوس-ايرەس پەن باسقا دا قالالاردا حالىق كوپ جينالدى.
نەگىزگى ميتينگ پارلامەنتتىڭ جانىندا ءوتتى، وندا ساياساتكەرلەر پرەزيدەنتتىڭ ەكونوميكانى قايتا رەتتەۋ جانە ەلدى 200 پايىزدىق ينفلياتسيا مەن 40 پايىزدىق كەدەيلىك دەڭگەيىنەن شىعارۋ ءۇشىن ەڭبەك قۇقىقتارىن قىسقارتۋ جوسپارىن تالقىلادى.
جەتى ميلليون مۇشەسى بار CGT گە باسقا كاسىپوداقتار مەن ازاماتتىق قوعام توپتارى قوسىلىپ، ولار جۇمىسشىلاردىڭ قۇقىقتارىنا قاتىستى «قول جەتكەن نارسەنىڭ ءبىر بولىگىن دە بەرمەۋگە» ۋادە بەردى.
«ادامدار نارازىلىق بىلدىرۋدە.. . مۇنى ەشكىم جوققا شىعارا المايدى»، - دەدى CGT باسشىلارىنىڭ ءبىرى گەكتور داەر.
12 ساعاتقا سوزىلعان ەرەۋىل قوعامدىق كولىكتەرگە، اۋە رەيستەرىنە جانە باسقا دا قىزمەتتەرگە اسەر ەتتى. Aerolineas Argentinas 300-گە جۋىق رەيستى توقتاتتى.
ەلدىڭ قاۋىپسىزدىك ءمينيسترى پاتريسيا بۋللريچ ميلەي اكىمشىلىگى جەڭىلمەيتىنىن ايتىپ، X الەۋمەتتىك جەلىسىندە ەرەۋىلگە شىققاندارعا قاراعاندا كوپ ادام جۇمىستا بولعانىن مالىمدەدى.
وپپوزيتسيالىق پارتيالار مەن كاسىپوداقتاردىڭ مالىمدەۋىنشە، ۇسىنىلعان قايتا رەتتەۋ جانە مەملەكەتتىك شىعىنداردى قىسقارتۋ حالىقتىڭ ەڭ وسال توپتارىنا اسەر ەتىپ، كەدەيشىلىكتى ارتتىرادى.
ميلەي 45 كۇن بۇرىن سايلاندى، ول قايتا رەتتەۋ جۇرگىزۋدى، شىعىنداردى ايتارلىقتاي قىسقارتۋدى جانە پەسو ديەۆالۆاتسياسىن جۇرگىزۋدى ۋادە بەردى.
ونىڭ سىناق مەرزىمىن ءۇش ايدان سەگىز ايعا دەيىن ۇلعايتۋ، جۇمىستان شىعارىلعان جاعدايدا وتەماقى مولشەرىن ازايتۋ جانە جۇكتىلىككە بايلانىستى دەمالىستى قىسقارتۋ ارەكەتىن سوت ەل كونگرەسىندە قاراۋعا دەيىن توقتاتىپ قويعان.
