ارمەنيا مەن ازەربايجان قارۋلى شابۋىلعا ءبىرىن-ءبىرى ايىپتادى
ازەربايجان. KAZINFORM - ءبىر كۇن بۇرىن ازەربايجان مەن ارمەنيا شەكاراسىندا قارۋلى قاقتىعىس بولدى. سالدارىنان قازا تاپقاندار مەن جارالانعاندار بار.
ازەربايجان سىرتقى ىستەر مينيسترلىگى 12- اقپان كۇنى ارمەنيا قارۋلى كۇشتەرىنىڭ ارانداتۋى ناتيجەسىندە ازەربايجان مەملەكەتتىك شەكارا قىزمەتىنىڭ ءبىر ساربازى جارالانعانىن حابارلادى. وسىعان وراي 13- اقپاندا ازەربايجان مەملەكەتتىك شەكارا قىزمەتى «ەسە قايتارۋ وپەراتسياسىن» جۇرگىزدى.
«وپەراتسيا ناتيجەسىندە گافان اۋدانى نەركين-اند ەلدى مەكەنى ماڭىنداعى ارمەنيا قارۋلى كۇشتەرىنىڭ اسكەري بەكەتى تولىعىمەن جويىلدى. ول جەردە ءبىر كۇن بۇرىن ءبىزدىڭ اسكەري قىزمەتكەرلەرىمىزگە قارسى وق جاۋدىرعان»، - دەلىنگەن ۆەدومستۆو حابارلاماسىندا.
ازەربايجان قورعانىس مينيسترلىگى بۇعان دەيىن 12- اقپان كۇنى ساعات 20:50 دە جانە 23:40 تا ارمەنيا قارۋلى كۇشتەرىنىڭ بولىمشەلەرى توۆۋزگالين اۋدانىنىڭ چينارلى ەلدى مەكەنىنە قاراي اتىس قارۋىنان ازەربايجان ارمياسىنىڭ توۆۋز اۋدانىنىڭ كوحانابي ەلدى مەكەنىنە قاراي وق اتقانى تۋرالى حابارلاعان بولاتىن.
ارمەنيا س ءى م اقپاننىڭ 13 ءى كۇنى ازەربايجان تاراپىنان جاسالعان شابۋىلدان ەكى ادام قازا تاپقانىن حابارلادى.
«ارميان جاعىندا قازا تاپقان جانە جارالانعان 2 اسكەري قىزمەتكەر بار. ازەربايجان ارمەنيا رەسپۋبليكاسىنا قارسى نەگىزسىز زاڭسىز اگرەسسياسىن جالعاستىرىپ جاتىر»، - دەپ جازدى ارمەنيا سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى ەدمون مارۋكيان X پلاتفورماسىندا.
ارمەنيانىڭ قورعانىس مينيسترلىگى 13- اقپاندا ازەربايجان تاراپى ماسكەۋ ۋاقىتىمەن 08:30 دا سيۋنيك وبلىسىنىڭ نەركين-حاندا اۋدانىنداعى ارميان جاۋىنگەرلىك پوزيتسيالارى باعىتىندا اتىستاردى توقتاتقانىن حابارلادى.
بۇعان دەيىن 11- اقپاندا ازەربايجان سىرتقى ىستەر مينيسترلىگى ارمەنيا پرەمەر-ءمينيسترى نيكول پاشينياننىڭ The Telegraph گازەتىنە بەرگەن سۇحباتىنا تۇسىنىك بەردى.
سىرتقى ساياسات ۆەدومستۆوسى ارميان ۇكىمەتى باسشىسىنىڭ مالىمدەمەسىن «كەزەكتى نەگىزسىز جالا جابۋ» دەپ باعالادى جانە ارمەنيانى حالىقارالىق مىندەتتەمەلەردى ساقتاۋعا جانە بەيبىت پروتسەسكە سوزبەن ەمەس، ءىس جۇزىندە ۇلەس قوسۋعا شاقىردى.
ەستەرىڭىزگە سالا كەتەيىك، 2023-جىلدىڭ 19- قىركۇيەگىندە ازەربايجان «كونستيتۋتسيالىق ءتارتىپتى قالپىنا كەلتىرۋ» ماقساتىندا قاراباقتا «جەرگىلىكتى سيپاتتاعى تەرروريزمگە قارسى ءىس-شارالاردىڭ» باستالعانىن جاريالادى.
جاۋىنگەرلىك ءىس-قيمىلدار ناتيجەسىندە تانىلماعان تاۋلى قاراباق رەسپۋبليكاسىنىڭ باسشىلىعى «قالعان ارميان اسكەريلەرىن» قاراباقتان شىعارۋعا، «تاۋلى قاراباقتىڭ قورعانىس ارمياسىنىڭ» قۇرىلىمدارىن تاراتۋعا جانە تولىعىمەن قارۋسىزداندىرۋعا جانە اۋىر اسكەري تەحنيكالار مەن قارۋ-جاراقتاردى اۋماقتان شىعارۋعا كەلىستى.
ارميان حالقى جاپپاي كوشە باستادى. 30- قىركۇيەككە قاراي قاراباقتان ارمەنياعا 100 مىڭنان استام بوسقىن كەلدى. ازەربايجان قاراباقتاعى ارميان وكىلدەرىمەن ايماقتى قايتا بىرىكتىرۋ تۋرالى كەلىسسوزدەردى باستادى.
