پارلامەنتتە قابىلدانعان زاڭدار ەل يگىلىنە قىزمەت ەتەدى دەپ سەنەمىز - ماۋلەن اشىمبايەۆ

Мәулен Әшімбаев: Балаларға қазақша контент жасаушыларды қолдау бір күндік шара болмау керек
Фото: ҚР Парламенті Сенаты

استانا. KAZINFORM - سەنات ءتوراعاسى ماۋلەن اشىمبايەۆ 7-شاقىرىلىمداعى پارلامەنتتىڭ 2-سەسسياسىنداعى پالاتا جۇمىسىن قورىتىندىلادى.

«بۇگىن ءبىز پالاتانىڭ 2-سەسسياداعى جۇمىسىن اياقتاپ، قورىتىندى وتىرىسىمىزدى وتكىزدىك. سەسسيا بارىسىندا مەملەكەت باسشىسىنىڭ «ادىلەتتى قازاقستان» قۇرۋ جولىنداعى تاپسىرمالارىن زاڭنامالىق تۇرعىدا قامتاماسىز ەتۋ ءۇشىن اۋقىمدى جۇمىس اتقارىلدى. جولداۋدا، ۇكىمەتتىڭ كەڭەيتىلگەن وتىرىسىندا جانە ۇلتتىق قۇرىلتايدا ايتىلعان، سونداي-اق پرەزيدەنتىمىزدىڭ وزگە دە تاپسىرمالارىن ورىنداۋ دەپۋتاتتاردىڭ باستى نازارىندا بولدى. جالپى، پارلامەنت 2-سەسسيادا 102 زاڭ قابىلدادى. ولاردىڭ ۇشتەن بىرىنە دەپۋتاتتىق كورپۋس باستاماشى بولعانىن اتاپ وتكەن ءجون. سونداي-اق 9 دەربەس زاڭ قابىلداندى. اتاپ ايتساق، «قر ازاماتتارىنىڭ مەملەكەت ىستەرىن باسقارۋعا قاتىسۋىن قامتاماسىز ەتەتىن قوعامدىق باقىلاۋ تۋرالى» زاڭ قابىلداندى. ادام ساۋداسىنا قارسى ءىس- قيمىلدىڭ قۇقىقتىق نەگىزدەرى مەن تيىمدىلىگىن ارتتىرۋعا، ادام ساۋداسى قۇرباندارىنىڭ مۇددەلەرىن قورعاۋعا ارنالعان زاڭ دا ماقۇلداندى. سونىمەن قاتار ايەلدەر مەن بالالاردىڭ كونستيتۋتسيالىق قۇقىقتارى مەن مۇددەلەرىن قورعاۋ ءۇشىن قىلمىستىق جانە اكىمشىلىك قۇقىق بۇزۋشىلىق تۋرالى زاڭناما قايتا قارالىپ، كۇشەيتىلدى. بۇعان قوسا، بۋللينگ، كيبەربۋللينگ ءۇشىن جاۋاپكەرشىلىك ەنگىزىلدى. قوعامدا كەڭ تاراعان تاعى ءبىر دەرت - لۋدامانياعا قارسى ءىس-شارالارى قولعا الىندى»، - دەدى ماۋلەن اشىمبايەۆ پالاتانىڭ جالپى وتىرىسىندا.

ونىڭ اتاپ وتۋىنشە، ويىن بيزنەسىن ۇيىمداستىرۋشىلارعا جاۋاپكەرشىلىك شارالارى كۇشەيتىلىپ، جارناما تالاپتارىنا قوسىمشا شەكتەۋ قويىلدى. باق قىزمەتكەرلەرىنىڭ مۇدددەلەرىن قامتاماسىز ەتەتىن جانە وسى سالادا ساپالى قۇقىقتىق مودەل قالىپتاستىراتىن ماسس-مەديا تۋرالى زاڭ قابىلداندى. مەملەكەت باسشىسى جولداۋدا تاپسىرعان مەملەكەتتىك ساتىپ الۋدىڭ جاڭا جۇيەسى ارنايى زاڭمەن بەكىتىلدى. جىلۋ ەنەرگەتيكاسى تۋرالى دەربەس جاڭا زاڭ دا قابىلداندى.

«بۇل زاڭ وسى سالاداعى كۇردەلى ينفراقۇرىلىمدىق ماسەلەلەردىڭ شەشىلۋىنە وڭ سەپتىگىن تيگىزەدى دەپ سەنەمىز. الەۋمەتتىك قولداۋ سالاسىنداعى زاڭناما دا ايتارلىقتاي جاڭاردى. مەملەكەت باسشىسىنىڭ تاپسىرماسىمەن «ۇلتتىق قور بالالارعا» جوباسى ىسكە اسىرىلا باستادى. دەنساۋلىق ساقتاۋ سالاسىنداعى ءبىرقاتار وزەكتى ماسەلەنى شەشۋگە، سونداي-اق دەنساۋلىق ساقتاۋ جۇيەسىن ودان ارى جەتىلدىرۋگە ارنالعان زاڭدار قابىلداندى. بيزنەستىڭ دامۋى ءۇشىن بارىنشا قولايلى جاعداي جاساۋدى كوزدەيتىن اۋقىمدى تۇزەتۋلەر دە قاراستىرىلدى. كاسىپكەرلەرگە اكىمشىلىك جۇكتەمە ازايتىلىپ، نەگىزسىز كەدەرگىلەر الىنىپ تاستالدى. جالپى، پالاتانىڭ قاراۋىنا تۇسكەن زاڭدار شەشىم قابىلدانار الدىندا ءماسليحات دەپۋتاتتارىمەن جانە ساراپشىلارمەن كەڭىنەن تالقىلانىپ، جان- جاقتى زەردەلەنىپ وتىردى. وسى جانە باسقا دا قابىلدانعان زاڭدار ەل يگىلىنە قىزمەت ەتەدى دەپ سەنەمىز»، - دەدى سەنات سپيكەرى.

سوڭعى جاڭالىقتار