پارلامەنت ۆەيپتەرگە تىيىم سالاتىن زاڭدى بەكىتتى
استانا. KAZINFORM - بۇگىن ءماجىلىستىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا سەناتتىڭ جاڭا رەداكسيادا ۇسىنعان جەكەلەگەن باپتارىمەن كەلىستى.
زاڭ حالىقتى ساپالى جانە تولىقتاي مەديتسينالىق كومەكپەن قامتاماسىز ەتۋ، مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ جۇيەسىن ەنگىزۋ ارقىلى زياندى وتەۋگە مەملەكەت كەپىلدىك بەرگەن پاتسيەنتتەردىڭ قۇقىقتارىن ىسكە اسىرۋ، مەديتسينالىق ماماندىقتىڭ مارتەبەسى مەن بەدەلىن ارتتىرۋ ماقساتىندا ازىرلەندى.
ايتا كەتەيىك، 14-ناۋرىزدا سەنات «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىن ەكىنشى وقىلىمدا قارادى. سەنات زاڭنىڭ جەكەلەگەن باپتارىن جاڭا رەداكتسيادا ۇسىنىپ، ونى ماجىلىسكە قايتاردى.
«ءماجىلىستىڭ الەۋمەتتىك- مادەني دامۋ كوميتەتى اتالعان زاڭنىڭ جەكەلەگەن باپتارىنا پارلامەنت سەناتى ەنگىزگەن وزگەرىستەر مەن تولىقتىرۋلاردى قاراپ شىقتى. بۇل تۇرعىدا، شەگىلمەيتىن تەمەكى بۇيىمدارىنىڭ، ەلەكتروندىق تۇتىنۋ جۇيەلەرىنىڭ (ۆەيپتەردىڭ)، ولارعا ارنالعان حوش يىستەندىرگىشتەر مەن سۇيىقتىقتاردىڭ اينالىمى ءۇشىن قىلمىستىق جاۋاپتىلىق ەنگىزىلگەن. وسىعان بايلانىستى سەنات دەپۋتاتتارى اتالعان ءىس- ارەكەت ءۇشىن وسى زاڭدى اكىمشىلىك جاۋاپتىلىقتى بولعىزبايتىن نورمامەن تولىقتىرۋدى ۇسىندى»، - دەدى ءماجىلىس دەپۋتاتى گۇلدارا نۇرىموۆا.
ياعني ۆەيپتەردىڭ ساۋداسى ءۇشىن قىلمىستىق جاۋاپكەرشىلىك ەنگىزىلىپ وتىر.
بۇدان باسقا، شەگىلمەيتىن تەمەكى بۇيىمدارى مەن ۆەيپتەردىڭ تاۋار بەلگىسىنىڭ ەلەمەنتتەرىن نەمەسە اتاۋىن پايدالانا وتىرىپ، تاۋارلاردى (جۇمىستاردى، كورسەتىلەتىن قىزمەتتەردى) جارنامالاۋعا، سونداي- اق شەگىلمەيتىن تەمەكى بۇيىمدارى مەن ۆەيپتەرگە سۇرانىس پەن قىزىعۋشىلىقتى ىنتالاندىرۋعا باعىتتالعان ءتۇرلى ءىس- شارالاردى، ونىڭ ىشىندە جۇلدەلەر ۇتىس ويىندارىن، لوتەرەيالاردى وتكىزۋگە تىيىم سالۋدى بەلگىلەۋدى كوزدەيتىن وزگەرىستەر مەن تولىقتىرۋلار ەنگىزىلدى.
«سەنات دەپۋتاتتارى جەكەلەگەن باپتارعا ەنگىزگەن وزگەرىستەر مەن تولىقتىرۋلار وسىعان دەيىن پارلامەنت ءماجىلىسى قابىلداعان زاڭنىڭ تۇجىرىمداماسىن وزگەرتپەيدى جانە ونىڭ مازمۇنىن ناشارلاتپايدى. وسى ورايدا اتالعان زاڭنىڭ جەكەلەگەن باپتارىنا سەنات ەنگىزگەن وزگەرىستەرمەن كەلىسۋدى ۇسىنامىز»، - دەدى دەپۋتات.
