پارلامەنت كوشى-قون تۋرالى زاڭدى قابىلدادى

استانا. KAZINFORM - ءماجىلىستىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا سەناتتىڭ جاڭا رەداكسيادا ۇسىنعان جەكەلەگەن باپتارىمەن كەلىستى.

«زاڭناما جانە سوت- قۇقىقتىق رەفورما كوميتەتى اتالعان زاڭنىڭ جەكەلەگەن باپتارىنا سەنات ەنگىزگەن وزگەرىستەر مەن تولىقتىرۋلاردى قاراپ شىعىپ كەلەسىنى اتاپ وتەدى.

پەنيتەنتسيارلىق جۇيە مەكەمەلەرىندە بەينەباقىلاۋ جۇيەلەرىن قاساقانا جويعانى نەمەسە بۇلدىرگەنى ءۇشىن قىلمىستىق جاۋاپتىلىقتىڭ ەنگىزىلۋىنە بايلانىستى سەنات دەپۋتاتتارى وسى نورما قولدانىلاتىن قىلمىستىق-اتقارۋ جۇيەسى مەكەمەلەرىن تەرگەۋ يزولياتورلارىمەن جانە ۋاقىتشا ۇستاۋ يزولياتورلارىمەن تولىقتىرۋدى ۇسىندى.

سونىمەن قاتار، سەنات دەپۋتاتتارى جازانىڭ بالامالى تۇرلەرىن بولدىرمايتىن تۇزەتۋلەر مەن ناقتىلاۋ سيپاتىنداعى تۇزەتۋلەر ۇسىندى. اتالعان وزگەرىستەر مەن تولىقتىرۋلار ءماجىلىسى قابىلداعان زاڭنىڭ تۇجىرىمداماسىن وزگەرتپەيدى.

وسىعان بايلانىستى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق- اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جەكەلەگەن باپتارىنا قازاقستان رەسپۋبليكاسى پارلامەنتىنىڭ سەناتى ەنگىزگەن وزگەرىستەر مەن تولىقتىرۋلارمەن كەلىسۋدى ۇسىنامىز. قولداۋلارىڭىزدى سۇرايمىز»، - دەدى دەپۋتات.

وسىلايشا ءماجىلىس دەپۋتاتتارى سەناتتىڭ جاڭا رەداكسيادا ۇسىنعان جەكەلەگەن باپتارىمەن كەلىستى.

ايتا كەتەيىك، وتكەن اپتادا سەنات حالىقتىڭ كوشى-قونىنا قاتىستى زاڭدى ماجىلىسكە قايتارعان بولاتىن.

«سونىمەن قاتار، وسى زاڭمەن، اۋىر نەمەسە اسا اۋىر قىلمىستار جاساعان شەتەلدىكتەردىڭ قازاقستان رەسپۋبليكاسىنا كەلۋىنە تىيىم سالاتىن نەگىزدەر كەڭەيتىلىپ وتىر. وسىعان بايلانىستى قىلمىستىق- پروتسەستىك كودەكستىڭ نورمالارىنا سايكەس كەلتىرۋ ماقساتىندا، «شەتەلدىكتەردىڭ قۇقىقتىق جاعدايى تۋرالى» جانە «حالىقتىڭ كوشى- قونى تۋرالى» ق ر زاڭدارىنا ءتيىستى تولىقتىرۋلار ەنگىزىلدى»، - دەگەن ەدى سەناتور سوۆەتبەك مەدەبايەۆ.

اۆتور

ەسىمجان ناقتىباي