اركتيكادا 56-45 ميلليون جىل بۇرىن تروپيكالىق كليمات بولعان
استانا. KAZINFORM - م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتى گەولوگيا فاكۋلتەتى قىزمەتكەرلەرىنىڭ ايتۋىنشا، ىستىق اۋا رايى سولتۇستىك مۇزدى مۇحيتتاعى مارجان ريفتەرىنە ۇقساس كاربوناتتى قۇرىلىمداردىڭ پايدا بولۋىمەن قاتار ءجۇردى، دەپ جازادى ت ا س س.
م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ گەولوگيا فاكۋلتەتىنىڭ قىزمەتكەرلەرى ا ق ش جانە ۇلى بريتانياداعى ارىپتەستەرىمەن بىرلەسە وتىرىپ، ەوتسەن كەزەڭىندە اركتيكادا تروپيكتىك كليمات بەلگىلەرى بولعانىن مالىمدەدى. ىستىق اۋا رايى سولتۇستىك مۇزدى مۇحيتتاعى مارجان ريفتەرىنە ۇقساس كاربوناتتى قۇرىلىمداردىڭ پايدا بولۋىمەن قاتار ءجۇردى، دەپ حابارلادى ۋنيۆەرسيتەتتىڭ باسپا ءسوز قىزمەتى.
- عالىمدار اركتيكادا ەوتسەندە (56-45 ميلليون جىل بۇرىن) كۇرت سالقىنداعان تروپيكالىق كليمات بولعان دەگەن قورىتىندىعا كەلدى. بۇل جۇمىس بۇكىل جەر كليماتىنىڭ تاريحىن ءتۇسىنۋ ءۇشىن ماڭىزدى، - دەلىنگەن حابارلامادا.
جۇمىس اۆتورلارى سولتۇستىك پوليۋس ماڭىندا ەوتسەن داۋىرىنە جاتاتىن مارجان ريفتەرىنە ۇقساس ءارتۇرلى پىشىندەگى كاربوناتتى قۇرىلىمداردى اشتى. بۇگىندە مۇنداي قۇرىلىمدار ەكۆاتورلىق جانە تروپيكتىك ايماقتاردا كەزدەسەدى. اۆتورلاردىڭ ايتۋىنشا، اركتيكاداعى تروپيكالىق كليمات كەزەڭى تەز باستالىپ، تەز اياقتالدى.
- زەرتتەۋ ناتيجەلەرى بويىنشا سوڭعى 56 ميلليون جىلداعى اركتيكادا كەنەتتەن بولعان كليماتتىق وزگەرىستەردى زەرتتەۋ ءۇشىن ارنايى جاڭا حالىقارالىق عىلىمي جوبا قۇرۋ ۇسىنىلىپ وتىر، - دەپ اتاپ ءوتتى ماسكەۋ مەملەكەتتىك ۋنيۆەرسيتەتى گەولوگيا فاكۋلتەتىنىڭ پروفەسسورى اناتوليي نيكيشين.
عالىمداردىڭ قورىتىندىسى Gondwana Research جۋرنالىندا جاريالاندى.
