ارشالى اۋدانىندا جالپى اۋدانى 300 گەكتار بولاتىن يندۋستريالىق ايماق قۇرىلادى
استانا. KAZINFORM - ارشالى اۋدانىندا جالپى اۋدانى 300 گەكتار بولاتىن يندۋستريالىق ايماق قۇرىلادى.
بۇل تۋرالى ۇكىمەت وتىرىسىندا استانا اگلومەراتسياسىن دامىتۋدىڭ 2024-2028 -جىلدارعا ارنالعان كەشەندى جوسپارىنىڭ جوباسىن تانىستىرعان پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.
«ازىق- تۇلىك بەلدەۋىن دامىتۋ جانە ينۆەستيتسيالاردى تارتۋ ءۇشىن 25 ازىق- تۇلىك ءوندىرۋ نىسانى، 12 ونەركاسىپتىك تاۋارلار ءوندىرۋ كاسىپورنى سالىنادى. ارشالى اۋدانىندا جالپى اۋدانى 300 گەكتار يندۋستريالىق ايماق قۇرىلادى. كەشەندى جوسپاردا قاۋىپسىزدىكتى قامتاماسىز ەتۋ جانە توتەنشە جاعدايلاردىڭ الدىن الۋ جونىندەگى دە ءىس- شارالار كوزدەلگەن. 2028 -جىلدىڭ سوڭىنا دەيىن 7 ءورت ءسوندىرۋ دەپوسى سالىنادى جانە حالىقتى حاباردار ەتۋ جۇيەسى قۇرىلادى»، - دەدى مينيستر.
نۇرلان بايبازاروۆتىڭ ايتۋىنشا، اگلومەراتسيانىڭ ەكولوگيالىق جاعدايىن جاقسارتۋ ءۇشىن قۋاتتىلىعى جىلىنا 40 مىڭ توننا بولاتىن 5 قاتتى تۇرمىستىق قالدىقتاردى سۇرىپتاۋعا ارنالعان جابدىقتاردى ساتىپ الۋ، جىبەك جولى اۋىلىنداعى ەسىل وزەنىن كەڭەيتۋ جانە ءتۇبىن تەرەڭدەتۋ، بوزايعىر اۋىلىندا ورماندى قالپىنا كەلتىرۋ ءۇشىن كوشەتتەر وتىرعىزۋ جوسپارلانعان.
«كەشەندى جوسپاردى ىسكە اسىرۋ قورىتىندىسىندا 2029 -جىلعا قاراي 3 مىڭنان استام تۇراقتى جانە ۋاقىتشا جۇمىس ورنىن قۇرۋ، 70 مىڭنان استام ادامدى مەديتسينالىق قىزمەت كورسەتۋمەن قامتاماسىز ەتۋ، وڭدەۋ ونەركاسىبىندە ءونىم شىعارۋ كولەمىن 120 پايىزعا دەيىن ۇلعايتۋ، جاقسى جانە قاناعاتتانارلىق جاعدايداعى جولداردىڭ ۇلەسىن 55 پايىزدان 70 پايىزعا دەيىن ارتتىرۋ جوسپارلانعان»، - دەدى ول.
