«اردىڭ ءىسىن» ارقالايتىن بۇگىنگى بۋىننىڭ شىعارماشىلىعىنا باعا بەرىلدى

  «gemen Qazaqstane» گازەتىنىڭ شاڭىراعىندا ادەبي-پوەتيكالىق كەش ءوتتى. ەگەمەندىك جاستار، «دارىن» جاستار سىيلىعىنىڭ يەگەرى جازۋشى باقىتبەك قادىردىڭ «جاسىل شاتىرلار»، جازۋشى اباي ايماعامبەتتىڭ دەتەكتيۆ جانرىندا جازىلعان «بۇرىلىسقا جارتى قادام قالعاندا» رومانىنىڭ، اقىن جانىبەك ءاليماننىڭ «جۇلدىزىمنىڭ جورىعى» ولەڭدەر جيناعىنىڭ تۇساۋى كەسىلدى.

ادەبي كەشتە «قازاق گازەتتەرى» ج ش س-ءنىڭ باس ديرەكتورى ديحان قامزابەك ۇلى بۇل بۋىن ادەبيەتكە ات شالدىرعان جىلدارى تىرناقالدى تۋىندىلارى وسى گازەتتە جاريالانىپ، كوپشىلىككە تانىلعانىن، جاستار بۇگىندە ۇجىمدا ەڭبەك ەتىپ قانا قويماي، وراسان دايىندىقپەن بىلەك تۇرىنە كىرىسىپ سۇبەلى كىتاپتارىن دا جارىققا شىعارعانىنا العىسىن ءبىلدىردى.

«قازاقتىڭ ءسوز ونەرىن كەلەشەككە جالعايتىن تولقىننىڭ ەكپىنىنە قاراپ قۋاناسىڭ. ادەبيەت وقىلمايدى دەگەن ارزان ءسوز. گازەتىمىزدى وقيتىن كوزىقاراقتى وقىرمان جاقسى بىلەدى رەداكسيانىڭ ادەبيەت پەن مادەنيەت بولىمىندەگى قىزمەت ىستەيتىن وسى جاس بۋىن ءتول مادەنيەتىمىز، رۋحانياتىمىزدىڭ ارعى- بەگى سالماعىن ەكشەي وتىرىپ، وزىندىك ولشەم، سىني سالىستىرۋ ارقىلى تالداعان ەڭبەكتەرىن دە وقۋشى قاۋىمعا ۇسىنا الىپ ءجۇر. بۇل جىگىتتەردىڭ ۇلتتىق، سالالىق جىر ءمۇشايرالاردا، ادەبي الامان بايگەلەردە دە ولجا سالىپ، وزا شابۋى وزدەرىنىڭ ينتەللەكتۋالدىق دەڭگەيى مەن پاراسات- پايىمىنىڭ بيىكتىگىن بايقاتادى»، دەگەن د. قامزابەك ۇلى «ەگەمەن جاستار» جوباسى تەك ءتول گازەتكە عانا ەمەس، ۇلتتىق باسىلىمدار ءۇشىن دە ماڭىزى زور ەكەنىن ايتتى. اراسىنا

«egemen Qazaqstan» گازەتى باس رەداكتورىنىڭ ورىنباسارى تالعات باتىرحان رەداكسيادا جاستاردىڭ شىعارماشىلىعىن شىڭداۋىنا، كۇندەلىكتى تىرشىلىك اعىسىنىڭ ەشقانداي توسقاۋىل ەمەس ەكەنىن اتاپ ءوتتى.

«ەرتەدەن ەرىپ كەلە جاتقان تىركەس بار ءوزى، «سىرەسكەن س ق» دەگەن. سول «سىرەسكەن س ق- نىڭ سەڭىن اقسەلەۋ سەيدىمبەك بۇزىپ ەدى. جاسىرارى جوق، «سوتسياليستىك قازاقستان» كەزىندە گازەتتىڭ سىرەسكەن كەزەڭى بولدى. اقسەلەۋ اعا مادەنيەت بولىمىنە اۋىسىپ كەلگەندە وسى قاساڭ تۇسىنىكتى كۇل-تالقان ەتتى. قازىر گازەت اپتاسىنا بەس مارتە شىعىپ، 80 مىڭنان اسا تيراجبەن وقىرمانعا تارالادى. اپتاسىنا ەكى رەت «ادەبي كالەيدوسكوپ» جانە «مادەني موزايكا»، «ادەبيەتتىڭ اڭگىمەسى»، «رۋحانيات» دەگەن ارنايى بەت شىعادى. ءتىپتى كەيبىر ادەبي گازەتتەرگە قاراعاندا «egemen Qazaqstan» ادەبيەت پەن مادەنيەتتىڭ اعىسىنداعى تۇشىمدى دۇنيەلەردى كوبىرەك جاريالايدى. گازەتتىڭ بۇلجىماس ءبىر مىندەتى - ەسىم- سويى جۇرت جادىنان كومەسكى تارتىپ ۇمىتىلا باستاعان تۇلعالاردى قايتا جاڭعىرتىپ جاريالاۋ. «ۇمىتپاڭدار مەنى» ايدارىمەن دە ادەبيەت پەن مادەنيەتتىڭ قاداۋ-قاداۋ تۇلعالارىنىڭ شىعارماشىلىعىنا، سان تاراۋ تاعدىرىنا قاتىستى سۇيەكتى دۇنيەلەردى دە جاريالايمىز. جاڭا ەسىم، جاس بۋىن دا قولتىعىن سوگە كوسىلسىن دەپ شىعارماشىلىق الەۋەتىن ارتتىرۋىنا دەم بەرىپ، تۋىندىلارىن ۇسىنىپ ءجۇرمىز. مۇنىڭ بارلىعى دا ادەبيەتتىڭ قازىرگى وكىلى سانالاتىن جاستارعا دەگەن قامقورلىقتىڭ بەلگىسى»، دەدى تالعات باتىرحان.

جازۋشى قۋانىش جيەنباي قانداي تۋىندى جازساڭ دا ايتار ويىڭ ويداعى قويشى مەن ەمەن ەسىكتىڭ ارعى جاعىنداعى مينيسترگە دە ۇعىنىقتى تىلمەن جەتكىزىلۋى ءتيىس ەكەنىن ەسكەرتتى.

«قۇندى شىعارما ەشقاشان ەسكىرمەيدى. مەن 1980-جىلدارى «جەر سىلكىنىسىنەن ءبىر جۇما بۇرىن» دەگەن پوۆەست جازدىم. جاقىندا الماتىدا جانە بىرنەشە وبلىستا سەزىلگەن جەر سىلكىنىسىنەن كەيىن كوپتەگەن ادام حابارلاسىپ، وسى شىعارمامدى وقۋعا سۇرادى. تاقىرىپ وقىرماننىڭ تالعامىنا تاتي ءبىلۋى كەرەك، جاستارىمىز وسىنى ەسكەرسە. تاعى ايتارىم، گازەت رەداكتسياسىندا وسى كەشتىڭ جۇلگەسىن ءۇزىپ الماي داستۇرگە اينالدىرۋ قاجەت»، دەدى جازۋشى ق. جيەنباي.

«ادەبيەتتىڭ اعىسىمەن وزگەشە تولقىن، جاڭا بۋىن كەلەدى، بۇل زاڭدىلىق. مەنىڭ قۋانعانىم، قازاق ادەبيەتىن كوشىن سۇيرەيتىن جاستاردىڭ قالىڭ شوعىرى ءوسىپ كەلەدى. بۇگىنگى ادەبي كەش وسى ءسوزىمدى سالماقتاي تۇسەدى. اسىرەسە پروزاعا قاراي كوڭىلى قۇلايتىن بۋىننىڭ قاتارى كوبەيىپ كەلە جاتقانى جانىڭدى جادىراتادى. بىزدەن كەيىنگى بۋىن، جاس تولقىن جاستار قازىرگى قازاق قوعامىنا نە كەرەك دەگەن ساۋالعا تاتيتىن سۇبەلى شىعارمالار جازادى دەپ سەنىم بىلدىرەمىن»، دەدى جازۋشى اسقار التاي.

اقىن داۋلەتكەرەي كاپ ۇلى بۇگىنگى كىتاپتارىنىڭ تۇساۋى كەسىلگەن اقىن- جازۋشىلاردىڭ وزىندىك سوقپاعى قالىپتاسقانىنا قۋاناتىنىن جەتكىزدى. اقىن تولقىن قابىلشا «ادەبيەت اردىڭ ءىسى» ەكەنىن ايقىنداي الىپ جۇرگەن زامانداستارىنا ساتتىلىك تىلەدى.

باتىرحان سارسەنحان پەن جانىبەك ءاليمان ولەڭدەرىمەن جيىلعان قاۋىمدى سەرپىلتسە، باقىتبەك قادىر مەن اباي ايماعامبەتتىڭ اڭگىمەلەرىنەن ءۇزىندى وقىعان قازاق ۇلتتىق ونەر ۋنيۆەرسيتەتىندە اكتەر ماماندىعى بويىنشا ءبىلىم الۋشى ستۋدەنتتەر دە شەبەرلىگىمەن ءتانتى ەتتى.

اقىن ۇلاربەك نۇرعالىم تىزگىندەگەن كەشتە ءانشى ساۋلەجان تاعزيا تاماشا اندەردى شىرقاپ كوپشىلىكتى سەرپىلتتى.

قۋانىش نۇردانبەك ۇلى