پاراۆولەيبولدان ەل قۇراماسىنىڭ 9 ويىنشىسى حالىقارالىق دارەجەدەگى سپورت شەبەرى اتاندى
اتىراۋ. KAZINFORM - وتىرىپ وينايتىن ۆولەيبولدان قازاقستان قۇراماسىنىڭ 9 ويىنشىسىنا حالىقارالىق دارەجەدەگى سپورت شەبەرى اتاعى بەرىلدى.
پاراۆولەيبولدان ەل قۇراماسىنىڭ باس باپكەرى باۋىرجان تاحاۋوۆتىڭ ايتۋىنشا، وتكەن جىل تابىستى بولعان.
«بىلتىر ءبىزدىڭ پاراۆولەيبولشىلار ەكى تۋرنيردە كۇمىس جۇلدەگە يە بولدى. ونىڭ ءبىرى - استانا قالاسىندا وتكەن ازيا چەمپيوناتى. بۇل دودادا الەمدەگى مىقتى كوماندالاردىڭ ءبىرى - قىتاي قۇراماسىن جەڭگەن ەدىك. ازيا چەمپيوناتىنىڭ قورىتىندىسىمەن ءبىزدىڭ كوماندا بيىل فرانتسيا استاناسى - پاريجدە وتەتىن پاراليمپيادا ويىندارىنىڭ ليتسەنزياسىن يەلەندىك. كەيىن قىتايدا حاڭجوۋ قالاسىندا وتكەن پارا ازيا ويىندارىندا دا كۇمىس جۇلدەگە قول جەتكىزدىك»، - دەيدى باۋىرجان تاحاۋوۆ.
حالىقارالىق دارەجەدەگى سپورت شەبەرى اتانعان ويىنشىلاردىڭ اراسىندا 8 اتىراۋلىق سپورتشى بار. ولار - باۋىرجان سارتايەۆ (كوماندا كاپيتانى)، پەردەباي نامۇراتوۆ، اقىلبەك شيكىبايەۆ، المات وسپانوۆ، ادىلەت سەيىتجاپار، نۇرتاۋ مۇحانبەتقالييەۆ، ەرلان بيتەمىروۆ جانە بەكەت تۇرنيازوۆ. توعىزىنشى ويىنشى - قىزىلوردالىق ەراسىل ابدىبەك.
ەسكە سالا كەتەلىك، قازاقستاننىڭ پاراۆولەيبولشىلارى ازيا چەمپيوناتىندا «كۇمىس» العانىن جازعان بولاتىنبىز.
