پارانجا مەن نيكاب كيۋگە تىيىم سالىندى

استانا. قازاقپارات - 2025 -جىلدىڭ 1-قاڭتارىنان باستاپ شۆەيتساريا بيلىگى قوعامدىق ورىنداردا بەتتى تولىعىمەن جاسىراتىن كيىم جانە پارانجا مەن نيكابتى كيۋگە تىيىم سالدى، دەپ حابارلايدى رەسەيلىك تاسس اقپارات اگەنتتىگى.

بۇل تالاپ ورىندالماعان جاعدايدا 100 دەن 1 مىڭ شۆەيتساريالىق فرانككە دەيىن (110,2 دوللاردان 1102 دوللارعا دەيىن) ايىپپۇل سالىنادى.

شۆەيتساريا حالقى 2021 -جىلدىڭ ناۋرىز ايىندا وتكەن رەفەرەندۋمدا ءتيىستى باستاماعا داۋىس بەردى. ول كەزدە ساۋالناماعا قاتىسۋشىلاردىڭ %51,2 ى تىيىم سالۋدى قولداعان. بۇرىن بۇل شەكتەۋ سانكت-گاللەن جانە تيچينو كانتوندارىندا ايماقتىق دەڭگەيدە عانا قولدانىلعان.

تىيىم نيكاب پەن پارانجا سياقتى مۇسىلمان ءدىنىن ۇستانۋشىلار كيەتىن كيىمدەرگە، سونداي-اق فۋتبول جانكۇيەرلەرى كيەتىن كيىمگە قاتىستى. ەندى ولاردى دۇكەن، مەيرامحانا، مەملەكەتتىك مەكەمە جانە قوعامدىق كولىكتە كيۋگە تىيىم سالىنادى. بۇل رەتتە بەتتى بۇركەپ تۇراتىن كيىمدى ءالى دە عيبادات ورىندارىندا، كارناۆالداردا نەمەسە سۋىقتان قورعاۋ ءۇشىن كيۋگە بولادى.

شۆەيتساريا پرەزيدەنتى كارين كەللەر-زۋتتەردىڭ ايتۋىنشا، بۇل تىيىم شۆەيتساريادا تۇراتىن 400 مىڭ مۇسىلماننىڭ از عانا بولىگىنە عانا اسەر ەتەدى. ساياساتكەر اتاپ وتكەندەي، ولاردىڭ اراسىندا نيكاب كيەتىن 20-30 عا جۋىق ايەل عانا بار.

تىيىم سالۋدىڭ ەنگىزىلۋىمەن شۆەيتساريا قازىردىڭ وزىندە ۇقساس ەرەجەلەرى بار ەۋروپا ەلدەرىنىڭ تىزىمىنە قوسىلدى. ولاردىڭ قاتارىندا اۋستريا، بەلگيا، بولگاريا، دانيا جانە نيدەرلاند بار. فرانسيا ءبىرىنشى بولىپ 2011 -جىلى بەتىن بۇركەيتىن كيىم كيۋگە تىيىم سالدى.

وسىعا دەيىن قىرعىزستاندا پارانجا كيىپ، ساقال قويعاندارعا ايىپپۇل سالىناتىنى تۋرالى جازعان ەدىك.