پاراليمپياداشىلارعا قولداۋدى اياماۋ كەرەك - ەلسيار قاناعاتوۆ

Паралимпиадашыларға қолдауды аямау керек – Елсияр Қанағатов
فوتو: qazaqsporty.kz

استانا. KAZINFORM - بۇگىنگى تاڭدا قازاقستاندىق پاراسپورتشىلار فرانسيا استاناسى پاريج قالاسىندا وتەتىن XVII پاراليمپيادا ويىندارىنا 7 سپورت تۇرىنەن 11 جولداما جەڭىپ الدى.

ايتا كەتسەك، پاراليمپيادا ويىندارى - 1960 -جىلدان بەرى ءار ءتورت جىل سايىن دەنە مۇمكىندىكتەرى شەكتەۋلى سپورتشىلار اراسىندا وتكىزىلەتىن سپورتتىق جارىس.

بيىلعى پاراويىندار 28-تامىزبەن 8-قىركۇيەك ارالىعىندا وتەدى. Kazinform تىلشىسىننە سۇحبات بەرگەن وليمپياداعا دايىندىق شتابىنىڭ جەتەكشىسى ەلسيار قاناعاتوۆ قازاقستان رەسپۋبليكاسى اتىنان پاراليمپياداعا 38 سپورتشى اپارۋدى جوسپارلاپ وتىرعانىن اتاپ ءوتتى.

«بۇگىنگى كۇنگە دەيىن پاراسپورتشىلارىمىز 7 سپورت تۇرىنەن 11 جولداما جەڭىپ الدى. بۇيىرسا، ءتورتجىلدىق دودادا 9 سپورت تۇرىنەن، اتاپ ايتساق، پارا جەڭىل اتلەتيكا، پارا پاۋەرليفتينگ، پارا تاەكۆوندو، پارا ۇستەل تەننيسى، پارا ءجۇزۋ، پارا دزيۋدو، پارا كانوە، پارا وق اتۋ جانە ۆولەيبولدى وتىرىپ ويناۋ تۇرلەرىنەن جالپى 38 سپورتشى ونەر كورسەتەدى دەپ جوسپارلاپ وتىرمىز»، - دەدى شتاب باسشىسى.

سونىمەن قاتار پاراليمپيادا ويىندارىندا سپورتشىلارىمىز سوڭعى ويىنداردا وتە جوعارى ناتيجە كورسەتىپ كەلە جاتقانىن باسا ايتتى.

«وزدەرىڭىز دە بايقاپ جۇرسىزدەر، سوڭعى ويىنداردا پاراسپورتشىلارىمىز ءاردايىم جارقىن جەڭىستەرىمەن قۋانتىپ ءجۇر. الىسقا بارماي-اق قويايىق، سوڭعى توكيو وليمپيداسىندا ساۋ دەنەلى سپورتشىلارىمىز الا الماعان التىنعا مۇمكىندىگى شەكتەۋلى سپورتشىلارىمىز قول جەتكىزدى. بۇل وزگە سپورتشىلارىمىزعا ساباق بولۋى ءتيىس. سوندىقتان پاراليمپيادادا جەڭىس تۇعىرىنان كورىنگەن سپورتشىلارىمىز ناعىز باتىرلار. ءبىز مۇمكىندىگى شەكتەۋلى سپورتشىلارىمىزدان دا ەشقانداي قولداۋدى اياماۋىمىز كەرەك»، - دەدى ەلسيار قاناعاتوۆ.

وسى ورايدا پاراسپورتشىلارىمىز جەتى سپورت تۇرىنەن جولدامانى قاشان، قالاي جەڭىپ العانىن وقىرمان نازارىنا ۇسىنا كەتكەندى ءجون سانادىق.

ءبىرىنشىسى - ەرلەر اراسىندا ۆولەيبولدى وتىرىپ ويناۋدان جولداما.

بۇل ليتسەنزيا 2023 -جىلى 3-8-شىلدەدە استانا قالاسىندا وتكەن ازيا چەمپيوناتىندا الىندى.

قازاقستان كومانداسى فينالدا يران قۇراماسىنان جەڭىلدى (الايدا يران كومانداسىندا ليتسەنزيا بولعاندىقتان، ازيا چەمپيوناتىنىڭ كۇمىس جۇلدەگەرى رەتىندە بۇل ليتسەنزيا قازاقستان قۇراماسىنا بۇيىردى).

ەكىنشىسى - يادرونى يتەرۋ ديستسيپليناسىندا پارا جەڭىل اتلەتيكادان جولداما.

بۇل ليتسەنزيا 2023 -جىلى 3-17-شىلدەدە پاريج قالاسىندا(فرانسيا) وتكەن پارا جەڭىل اتلەتيكادان الەم چەمپيوناتىندا الىندى. قازاقستاندىق سپورتشى داستان مۇقاشبەكوۆ ءۇشىنشى ورىنعا قول جەتكىزىپ، قولا مەدالعا يە بولدى (ليتسەنزيا وسى سپورت تۇرىندە 1-4-ورىن العان سپورتشىلارعا بەرىلدى).

ءۇشىنشىسى - براسسپەن 100 م ديستسيپليناسىندا پارا جۇزۋدەن ليتسەنزيالار (3 جولداما).

بۇل جولداما 2023 -جىلى 27-شىلدە - 8-تامىز ارالىعىندا مانچەستەر قالاسىندا ( ۇلى بريتانيا) وتكەن پارا جۇزۋدەن الەم چەمپيوناتىندا الىندى. قازاقستاندىق سپورتشى جۇماعالي نۇرداۋلەت ەكىنشى ورىنعا قول جەتكىزىپ، كۇمىس مەدالعا يە بولدى (جولداما وسى سپورت تۇرىندە 1-3-ورىن العان سپورتشىلارعا بەرىلدى جانە قالعان جولداما اقپان ايىنىڭ باسىندا حالىقارالىق فەدەراتسيادان بەرىلدى).

ءتورتىنشىسى - 200 مەترگە KL 200 ديستسيپليناسىندا پارا كانوەدەن جولداما.

بۇل جولداما 2023 -جىلى 19-29-تامىزدا دۋيسبۋرگ قالاسىندا (گەرمانيا) وتكەن بايداركا مەن كانوە جانە پارا كانوەدەن الەم چەمپيوناتىندا الىندى.

قازاقستاندىق سپورتشى بيبارىس سپاتاي بەسىنشى ورىن الىپ، جوداماعا قول جەتكىزدى.

بەسىنشىسى - پارا پاۋەرليفتينگتەن جولداما

قازىرگى ۋاقىتتا وتاندىق سپورتشى داۆيد دەگتياريەۆ رەيتينگتىڭ ءبىرىنشى ورنىندا تۇر جانە جوداما الۋ ءۇشىن ول 2024 -جىلى ەكى الەم كۋبوگىنا قاتىسۋى كەرەك.

التىنشىسى - پارا تاەكۆوندودان ليتسەنزيالار (3 جولداما)

قازىرگى ۋاقىتتا رەيتينگ قورىتىندىسى بويىنشا ءۇش وتاندىق سپورتشىعا ليتسەنزيا بەرىلدى. اتاپ ايتقاندا، 57 ك گ دەيىن - دوسمالوۆا كاميلا، 80 ك گ دەيىن - دومبايەۆ نۇرلان جانە +80 ك گ - نىشان ءومىرالى.

جەتىنشىسى - پارا وق اتۋدان جولداما

قازاقستاندىق سپورتشى ەركىن عابباسوۆ پنيەۆماتيكالىق مىلتىقتان پاراليمپيادالىق اتۋ بويىنشا الەم كۋبوگىندا ەكىنشى ورىن الدى. سونىمەن پاريج-2024 پاراليمپيادا ويىندارىنا قاتىساتىن بولدى. سونىمەن قاتار 2024 -جىلعى مامىر- ماۋسىم ارالىعىندا 5 سپورتتىق ءىس-شارا وتكىزۋ جوسپارلانىپ وتىر. وندا سپورتتىڭ 5 ءتۇرى بويىنشا 16 ليتسەنزيا جەڭىپ الۋ جوسپاردا بار.

ەستەرىڭىزگە سالا كەتسەك، «توكيو - 2020» پاراليمپيادا ويىندارىندا قازاقستان ۇلتتىق قۇراماسىندا 25 سپورتشى بولدى. 5 مەدالگە قول جەتكىزىپ (1 التىن، 3 كۇمىس جانە 1 قولا) جالپى كوماندالىق ەسەپتە 48-ورىندى يەلەندى.

ەستەرىڭىزگە سالا كەتەيىك، وسىعان دەيىن وليمپياداعا جولداما سانى بويىنشا قاي ءوڭىر كوش باستاپ كەلە جاتقانىن جازعان بولاتىنبىز.

اۆتور
كۇنسۇلتان وتارباي

سوڭعى جاڭالىقتار